كحة موظف

النهاردة أول يوم ف شغلى الجديد صاحى من نومى فايق سعيد وقلبى من جوايا بيتنطط معايا يوم تاريخى ف عمرى أكيد لبست هدومى ونزلت أجرى النهاردة يومى لازم أروح بدرى مش ناقصة تأخير ولا ناقصة مدير من أول يوم يقولى ما بدرى وصلت شغلى ف ميعادى تمام وأول ما دخلت رميت السلام وكل الموظفين اللى كانوا موجودين ردوا عليّا بكل احترام سلمت على المدير وباركلى وهنانى وبعد الترحاب وبعد التهانى قالى تعالى نقعد ف المكتب نتكلم شوية عايزك ثوانى قالى بالنسبة لموضوع المهية هتقل عن ما قولتلك ف المقابلة الشخصية وبعد كام شهر هيتغير الأمر وواحدة واحدة هعليهولك شوية وقالى كمان كل اللى بيشتغل معانا لازم يمضى على وصل أمانة وياريت ماتخدش الموضع بحساسية أنا ما أقصدش أى إهانة قولتله طيب وبالنسبة للعقد اللى يضمنلى حقى ساعة الجد قالى كل اللى شغالين هنا بما فيهم أنا ماعناش عقود واسأل أى حد سألته عن التثبيت قالى ماعدش أصل الغرا شح وقالى خد بالك أى غلطة ممكن أمشيك فاشتغل صح سألته هو اللى قبل منى مشى من الشغل ليه قالى مفيش وهو شغال مرة كح