"محمود" وفريقه انتشروا في شوارع المنصورة للتشجيع على القراءة

بالتزامن مع مهرجان "القراءة" الأول بالمنصورة، قرر مجموعة من الشباب تشجيع الأهالي على القراءة بطريقة مختلفة، جابوا شوارع المنصورة بالعجل ممسكين بلافتات تشجيعية، تحت شعار "بعيد عن السياسة.. اقرأي يا منصورة". "إحنا شباب بنحب القراءة، مش تبع أحزاب ولا حركات ثورية ولا لينا في السياسة، كل هدفنا نشر الوعي بين الناس بالقراءة"، قالها محمود محمد، أحد المشاركين في فعالية "اقرأي يا منصورة"، مؤكدًا: "أول مرة ننزل الشارع ونلف على الناس نشجعهم على القراءة، إحنا طول الوقت كنا بنقرا ونحاول نشد أصحابنا في الجامعة للقراءة، بس فكَّرنا نستغل فرصة أول مهرجان للقراءة يتعمل في المنصورة وقولنا ننزل نشارك فيه بطريقتنا". يتمنى الشاب العشريني أن تكون فكرة نزول الفريق للشارع سببًا في زيادة القراءة ولو بنسبة بسيطة، ويقول: "الناس كلها بقت مبتعملش حاجة غير إنها تتفرج على الأحداث وحياتنا كلها سياسة، وإحنا بنحاول إننا في وسط كل ده نخليهم يقروا ويستفيدوا عشان الناس مبقتش مهتمة بالقراءة زي الأول"، قرر "محمود" وفريقه أن يكرروا النزول في الشارع لحث الأهالي على القراءة، بعد استجابة البعض لفكرتهم، "ناس كتير بقت تسألنا إحنا تبع مين ويشوفوا أفكارنا، بس إحنا أي حد بيوقفنا بنسمعله ونجاوب عليه ونفهمه هدفنا، معظم الناس اللي قابلتنا كانت بتدعم الفكرة وتديعلنا، وقابلنا ناس انضموا لينا بيحبوا القراءة وفيه منهم مكنش بيفتح كتاب وقرر إنه يجرب ووعدنا إنه يبدأ يقرأ"، بحسب "محمود".