«السيسى» فى افتتاح مطار الغردقة: «محدش يقدر يرجّعنا للوراء»

افتتح الرئيس عبدالفتاح السيسى، أمس، مبنى الركاب الجديد بمطار الغردقة الدولى بعد 5 سنوات من بدء عملية إنشائه، ويهدف المبنى الجديد للقضاء على تكدس السائحين فى أوقات الذروة فى صالات السفر والوصول وزيادة الطاقة الاستيعابية من 5.5 إلى 13 مليون سائح سنوياً. وقال «السيسى» فى كلمة ألقاها أثناء الافتتاح: «مفيش حاجة اسمها نظام، فيه حاجة اسمها مصر، دولة مصرية، الشعب المصرى ينتخب، يأتى رئيس يمسك دولة واقفة على حيلها، مش نظام كل شوية يتغير ولما يتغير يقولوا لا، هى دولة مصرية، بمؤسساتها سواء إعلامها وقضاؤها وجيشها، كلها تشتغل علشان خاطر بلدها، يتغير الحد ييجى حد تانى، يكمل بالدولة، مش بحد تانى». وأضاف: «مهم أوى ننتبه للكلام ده، محدش هيقدر يرجّع مصر للوراء، أنا مش بطيّب خاطر الناس، انتم غيرتم الدنيا كلها، يبقى إزاى فيه حد هييجى غصب عن المصريين، محدش اتعلم ولاّ إيه؟، وأنا مش همنع حد، ولكن المصريين اللى هيمنعوا، إحنا خايفين على بلدنا وهنموت علشان خاطر بلدنا». وأضاف: «لن يستطيع أحد العودة بمصر إلى الوراء، وما فعله المصريون خلال الأربعة أعوام الماضية هو درس للعالم أجمع»، مضيفاً: «الأشخاص يتغيرون وتبقى مصر، وهناك من يزعجهم أن يكون المصريون خلف شخص واحد». وأمر الرئيس القائمين على العمل بوزارة الطيران بألا يستغرق مشروع إنشاء حقل الطيران فى مطار الغردقة الدولى أكثر من 5 شهور فقط، وانتقد الطيار حسام كمال وزير الطيران المدنى لدى حديثه عن تكلفة إنشاء الحقل الجوى بمطار الغردقة والتى تقدر بنحو 450 مليون جنيه، موضحاً أن هذا الرقم مبالغ فيه.