بالصور| المشاية في المنصورة.. هنا مقر إعلانات اعتذار "الحبيبة"

"آسف ..بحبك..تتجوزيني" وسيلة اعتذار قدَّمها فيلم "السلم والثعبان"، انتشرت من بعده، وزادت وتيرتها مؤخرًا لتظهر في مناطق عدة، طرق سريع، وكليات، وامتد الأمر إلى المحافظات، ليتحول الأمر إلى شبه "روتين" مع تخصيص مواضع ثابتة له. على المشاية، أمام نادي الجزيرة الرياضي بالمنصورة، تحوَّلت لوحة الإعلانات التابعة لشركة "الشربيني للدعاية والإعلان" إلى مقر ثابت للاعتذارات التي يتوجَّه بها المحبون إلى حبيباتهم، حيث اعتاد المارة على متابعة إعلانات الاعتذار الشهرية على نفس العمود. "بحبك يا روشا، أنا فعلًا آسف على أي حاجة وحشة عملتها فيكي.. حسان" نص لرسالة استمرت طوال شهر في نفس الموضع، قبل أن تحل مكانها أخرى من أحمد حسان لحبيبته مريم: "أنا آسف فعلًا، على كل حاجة، قولي لعيلتك تديني فرصة تاني، أنا فعلًا محتاجك". نهايات سعيدة للحالتين في الإعلانين وثالث في الطريق أكثر ابتكارًا، هذا ما يؤكده علي الشربيني، مدير شركة الدعاية المسؤولة عن اللافتة: "أصحاب الاعتذار الأول خلاص هايتجوزوا كمان أيام، وأصحاب الاعتذار التاني اتصالحوا فعلًا والموضوع مشي.. الاعتذارات العلنية بتجيب نتيجة". عن سر الموضع يحكي الشربيني: "اخترنا المكان الأول إعلان عشان قدام بيت البنت، بعد كده الناس اتعودت على المكان وبقوا يستنوا الإعلان اللي بعده، زمان كانت الإعلانات أصغر وأبسط، لكن دلوقتي الناس واخداها جد أوي، الشهر بتلات آلاف، والأسبوع بألف شامل تكلفة البانر". الكثير من الأخطاء اللغوية باللافتات الإنجليزية: "بيجيبوا النموذج جاهز على الطبع، كتير نصحت زباين إننا نصلح الأخطاء، لكن هم عاوزينها كدا، وطبعا هم أحرار ما دام مفيش حاجة تمس حد بحاجة وحشة". في طريقها إلى عملها تمر الشابة نسمة يوسف باللافتة يوميًا: "دي ناس بتدور على حاجة ملفتة لجذب الانتباه والشهرة ليس أكثر، خصوصًا مع مواقع التواصل الاجتماعي، وفعلًا من أول بانر اتعلق وصفحات المنصورة كلها نزلت صورته وبقى حسان ده دلوقتي أشهر واحد هنا". لا تنكر الشابة الرومانسية التي تتعلق بالأمر: "مشاعر مختلفة بتراود الواحد لما يبص للافتة سعرها بالآلاف، فرحة ورومانسية وفضول لمعرفة البنت اللي دوخت حبيبها كدا، وتفكير في الغلابة اللي كانت هاتفرق معاهم لو المبالغ المدفوعة في الإعلان راحت لهم".