توقف البناء في مسجد بالتجمع منذ 10 سنوات.. وأهل الخير: "صاحبه غايب"

10 سنوات تمر والمكان محاط بمواد البناء، يتردد عليه العمال من حين لآخر دون أي انجاز حقيقي، فالمسجد في التجمع الخامس الذي تصل مساحته إلى ألف متر لم يكتمل بناؤه حتى الآن، مقررا أهالي الخير بالمنطقة البحث على صاحبه لمساعدته في استكمال بنائه. "الجامع قايم على الجهود الذاتية، ومفيش أي جهة أو جمعية بتموله، ولو فضلنا على الحال ده محتاجين 10 سنين تاني لحد ما يخلص"، قالها منتصر محمد، أحد سكان المنطقة، مؤكداً أن المسجد من وقت توقف بنائه لم يتوصلوا لصاحبه "المسجد مالوش اسم لحد دلوقت، حاولنا ندور على صاحبه من يوم ما عرفنا إنه مش تبع أي مؤسسة، بس مش عارفين نوصل لحد، ولا عارفين نجمع فلوس عشان نكمل بناء، عشان تستفيد بيه الجيران، لأنه المسجد الوحيد اللي جوه المناطق اللي مفهاش خدمات في التجمع". يجتمع "منتصر" وجيرانه داخل المسجد لأداء صلاة الجمعة كل أسبوع.. "من يومها فيه ناس مبتقدرش تخرج لحد المساجد المعروفة على الشارع الرئيسي، فبقينا ندخل نصلي فيه كل جمعة، والشيخ محمد اللي بيؤم بينا الصلاة، ومحدش بيكلمنا، لأن المسجد ملهوش بواب ولا حارس ولا باين ليه صاحب، وكل واحد بيجي بسجادته ويصلي عليها"، يشير إلى البناء غير المكتمل "المسجد على مساحة كبيرة، ولو كمل بناؤه هيخدم ناس كتير في المنطقة، ودلوقت بنجمع فلوس من أهل الخير عشان أول ما نوصل لصاحب المسجد نبقى جاهزين ونساعده".