«سندريلا» تحتفل بـ«مولد النبى»: بتغنى بـ100 جنيه.. وتسكت بـ75

بعد «صافيناز» و«سمارة» و«شاكيرا» و«باربى»، لم يتبق أمام صناع عرائس المولد سوى صناعة العروس «السندريلا»، لجذب مزيد من الزبائن قبل أيام قليلة من احتفالات المولد النبوى الشريف، «عملنا كل الأشكال عشان نجذب الناس وأخيراً عملنا عروسة السندريلا؟».. قالها سيد زكى، بائع عرائس بمنطقة الإسعاف. «زكى» منذ بدء الطقوس الخاصة بالمولد النبوى وهو لا يهدأ له بال، فكل ما يشغله هو بيع بضاعته وشراء غيرها، فلا يريد أن ينتهى المولد بدون استفادة مادية تكفى نفقات أسرته: «اكتشفنا السنة دى إن الناس بتحب الحاجات الجديدة والغريبة، والسندريلا مش غالية أوى، يعنى لو هترقص تبقى بـ100 جنيه ولو هتقف ساكتة هتبقى 75». «زكى» يرى أن تخلى الورش عن صناعة العروسة التقليدية للمولد، أنعش حركة البيع والشراء هذا العام على عكس الأعوام السابقة: «وقت ما نزلت العروسة بالطرحة عملت ضجة فى السوق، وكمان لما نزلت بعيالها السنة اللى فاتت، من هنا عرفنا إن الشعب مبقاش يشترى التقليدى، يعنى من الآخر هتخترع هتبيع، غير كده هتقف محلك سر».