م الآخر| يوميات موسيليني وعطية "سيكــــويا" (46)

طبعاً أنا عارفة إنكوا مستغربين جداً لية إبليس عاوز يظبط موسيليني مع فوففا، ونفض لحوار رنا خالص، اللي حصل إن بيسو الإبليس بعت توتي (صبي الشياطين) لحد رنا يشوف إية نظامها، لسة مزة لابسة مفتوح و ضيق.. لسة السيجارة في إيديها.. لسة سينجل ومقضياها مودي وهشام.. المهم لما راح توتي لسة كان هيطير لحد الدور التامن لاقها نازلة من بيتها ولابسة واسع وطويل مش دة المهم.. المهم إنة لقاها نازلة معاها ٣ عيال وراجل شكلة بيقول إنة جوزها.. بس توتي مسكتش فضل ماشي معاهم قال يتأكد مين دول اللي معاها، فسمع البنت الصغيرة بتقولها "مامي هو إحنا رايحيين فين؟" فـ رنا ردت وقالتلها "إسألي بابي يا حبيبتي" وهنا توتي فهم إن رنا أم وتعول، فقرر يطير علي بيسو يبلغوا بالجديد. وفعلاً توتي وصل لـ بيسو الإبليس وأول كلمة قالهالة "مستر بيسو فكك من الكعبلة..رنا إتجوزت وبقت بيئة جداً كبقتش رنا المزة بتاع زمان" بيسو قالة "يعني إية مش فاهم.. وضح أكتر، فرد عليه توتي وقالة "يعني يا مستر بقت سكة الكارينا والطرحتين الفوشيا والبني معمولين لفة سهير رمزي والبلوزة الشيفون المخرزة بقت حاجة كدة إخيييية يا مستر".. ووقتها بس إبليس غير الخطة.. إبليس حسبها.. قال أنا لو قربت موسيليني من رنا يبقى أنا كدة بضيع وقتي.. ففكر وقراره كان "فوففا". إبليس كان عارف إنة هيتعب جداً في إنة يقرب ما بين موسيليني و فوففا..بس كان شايف إن الموضوع يستاهل التغب نظراً لإن فوففا مش بس هتبعدة عن عطية لأ دية فوففا كمان تؤَمِن له رحلة سعيدة آمنة و مجاناً لجهنم الحمرا و الزرقا و لفترة محدودة جهنم الفسفورية لمحبي آخر صيحات الموضة! خلونا نرجع لموضوعنا الأساسي.. موسيليني كان عندة ميعاد مع فوففا وفعلاً نزل وصل تحت بيتها.. كلمها و قالها يلا إنزلي.. نزلت فوففا يمينها وشمالها مجموعة شياطين مجهزين بنظام "الإغراء الذاتي" ركبت فوففا جمب موسيليني.. موسيليني بصلها وقالها تحبي تروحي فين؟ ردت عليه وهي عاملة "الداك فيس" وشفايفها متغطية بأحمر شفايف عسل البنات أبو أتنين ونص وقالتلة تعالي نروح "سيكويا".. وفعلاً وصلوا وأول وا قعدوا موسيليني قالها: ها بقا إية حوار عطية؟ هي: هقولك بس أرجوك أوعدني متتعصبش وأوعدني إنك متكلمهاش تشتمها (طبعاً المقدمة بتاعة فوففا نارية اللي هو إتعصب واجري كلم عطية إشتمها!) هو: طب إنجزي وإحكي هي: هحكيلك..بص يا موسيليني من الآهر كدة عطية كانت بتكدب عليك..عطيه عملت حوار الصويت والتاكسي عشان تخليك تنزل و تسيب طنط..عطية كانت بتشتغلك..بس بروميس مش تقولها إني قولتلك! كان رد فعل موسيليني إنه.. يتبع