م الآخر| "عن جيل التمانينات .. أتحدث"

عن أبله فضيله وماما نجوى .. عن بوجى وطمطم وعروستى .. عن أول "كـَـته" فى مدرستى .. من وأنا إعدادى فـ سنه أولى! عن سوبر ميكى .. وبطــوط .. وسلاحف النينجا و"باور رنجرز" عن جيل مسـتخدمـش البامبرز .. وكــبر وإتربى على كــفوله !! عن "هرقل" ومسلسل "زينــه" واللمـــه فى تعــليق الـــزينه .. عن لعب الفوانيس فى الحــاره !! عن جيل تِلتينه دخل فـ حقـوق .. والتِلت التالت فــ تجــاره !! عن أول ماتش فـ "يابانيه".. بنجوم العالم..وأوروبا .. عن كل اللحظات الصعبه .. عن ضرب البيبسى على "ميرندا"!! عن أول جيل شاف المحمول .. عن جيل إتهــرا طعميه وفــول .. عن جيل معدوم مطحون .. مذلول .. بالجون اللى جابوه فـ "هولندا"! عن جيرسى وسامبا وجيلى كولا .. ومسابقة عجــلة "كوكاكولا .. عن "نيللى" وفوازير "شريهان" !! الواحد لو فعلا قادر .. هيرجع كل ليالى زمــان !! ياصحابى وكل اللى فــ جيلى .. انا عايز اقولكوا على حاجه !! تقريباً كده – والله أعلم – كلنا معملناش ولا حاجة! فـ بدل مالواحد يحرج روحه مع الايام .. خُـدلك "تعسيله" من الاحـــلام .. وإرزعــها فــ أقرب تلاجة!