م الآخر| كل شئ فـ الحب هان!

كل شئ فـ الحب هان .. واللي خان هو اللي فاز .. والإزاز أصبح تراب .. والتراب أصبح إزاز .. واللي جاز إن التراب .. فجأة يتحول دهب .. والْتَهَب حُضن الوَلَا .. والْبَلَا جَمْرِة لَهَب .. حاضِن بَلَائُه بيشتري .. والمفتري كان شروته ! حَبِّتُه! آه حَبته .. كِرهته بعين الغِنا .. والغُنا كان ثروته .. يديها غنوة تشجعة ؛ تديله جرح يموته ! حبته .. وماحبتوش .. والوشوش بدأت تطير .. اشترت حُبُّه بفشوش .. باعت الحب بكتير ! والأسير راجع ورا .. والوَرا سحبه لـ وَرا .. والوَرا سحبه لـ وَرا .. بقا حد مـ الصف الأخير ! لقى حبل نازل مـ السما .. قال: ربما طوق النجاة.. حب الحياة وماحبتوش .. ماستنتوش ليه الحياة ! الموت طلعله من العدم .. والخدم عاملين حداد .. وحبيبتُه واقفة مزقططة .. ومظبّطة الدور باجتهاد .. وعينيها طوبة اتفجرت .. واتكَسَّرِت روحه الإزاز ! كل شئ فـ الحب هان .. واللي خان هو اللي فاز!