"منة" 5 سنوات وتعاني من ضمور في المخ.. والأب: المستشفى قالت ملهاش علاج
حالتها تزداد سوء يومًا بعد يوم، تلزم الفراش ولا تستطيع التحرك منه منذ أن كان عمرها 5 شهور، منة أحمد محمد السيد، عمرها 5 سنوات، تعاني من "ضمور في المخ"، ورفضت المستشفى الحكومي علاجها، وفشل الأطباء في إيجاد علاج لتخفيف آلمها، وعدم قدرة الأب على توفير المال جعلته عاجزًا أمامها.
يقول أحمد السيد، والد الطفلة منة: "حرام بنتي تعيش في السرير، عمرها 5 سنوات، ضعيفة ومش بتقدر لا تتحرك ولا تتكلم، وعندها تبول لا إرادي بسبب الضمور في المخ، كل يوم حالتها بتزيد سوء، وأنا واقف عاجز قدامها مش عارف أعملها إيه، أنا راجل ميكانيكي في شركة بعقد مؤقت مرتبي 800 جنيه، عايش في منطقة شعبية في الإسكندرية".
يصرخ والد منة، "حد ينقذ بنتي حرام عليكم، ومن هي عندها 5 شهور أول ما بدأت الأعراض تبان عليها جريت بيها على الدكاترة، محدش عارف إيه علاجها، وكل اما اروح لواحد يقولي بنتك ملهاش علاج، هتفضل كده وحالتها هتزيد سوء، ولما رحت لمستشفى طلبة سبورتنج عشان تتعالج على نفقة التأمين الصحي، قالولي اعملها علاج طبيعي، ومدوهاش أي أدوية ولا سألوا فيا بعد كده".
ويضيف "أنا عاجز مش عارف علاجها إيه، كل اللي أنا طالبه إن المسؤولين يبصوا على الغلابة شوية، ويحسوا بوجعهم وآلمهم، إحنا بنموت ولسه فينا نفس، عايز بنتي تروح مستشفى واحد يكشف عليها ويقولي تشخيص حالتها إيه، وإيه اللي هي محتاجاه، إحساس الأب أنه عاجز ومش عارف يعالج بنته إحساس صعب، وجزء من مرتبي ضايع على علاجها".
وطالب والد منة، الرئيس عبدالفتاح السيسي، بالنظر إلى ابنته وإلى كل أطفال مصر اللي بيعانوا من المرض وأهلهم على باب الله، والمستشفيات الحكومية مش راضية تعالجهم ومش بتعاملهم زي الناس اللي معاهم فلوس.