«منة» 5 سنوات بلا حركة.. والأطباء: «مفيش علاج»

قُدِّر لها أن تلازم الفراش فى أجمل مراحل عمرها، لم تستمتع بطفولتها كمثيلاتها من الفتيات، إذ أقعدها مرض وراثى عن الحركة بعد ولادتها بـ5 شهور، وقضت 5 سنوات، هى كل عمرها، طريحة الفراش.. «منة أحمد محمد السيد» رفض المستشفى الحكومى علاجها، وفشل الأطباء فى تخفيف آلامها، وعجز الأب الفقير عن توفير المال لعلاج طفلته فى المستشفيات الخاصة. بدموع القهر يتحدث أحمد السيد، والد الطفلة، يقول إن «منة» تعانى ضموراً فى المخ، تسبب لها فى شلل تام، ويتابع: «بنتى ضعيفة، مش بتقدر لا تتحرك ولا تتكلم، وعندها تبول لا إرادى، وأنا واقف عاجز قدامها مش عارف اعمل لها إيه، أنا راجل ميكانيكى فى شركة بعقد مؤقت، ومرتبى 800 جنيه فى الشهر». ويصرخ والد الطفلة: «أول ما بدأت الأعراض تبان عليها جريت بيها على الأطباء، محدش عارف إيه علاجها، وكل ما أروح لواحد يقولى بنتك ملهاش علاج، حتفضل كده، ولما قصدت مستشفى طلبة سبورتنج علشان تتعالج على نفقة التأمين الصحى، قالولى اعمل لها علاج طبيعى، ومعطونيش أى أدوية، ولا سألوا فيا بعد كده». من جانبه، يقول الدكتور محمود الكسبانى، مدير فرع هيئة التأمين الصحى بالإسكندرية، إن ضمور المخ مرض وراثى ليس له علاج، ويتم التعامل معه من قبَل إخصائيى الحركة فى العلاج الطبيعى، لأن الحركة لدى المريض تتوقف تماماً مع تفاقم المرض.