م الآخر| "تعالي اشرب شاي يا جون"
المواطن المصري فتاي بطبعه كلنا بنحب الفتى زى عنيينا محدش فينا بيعرف يقول كلمه معرفش، أنا لما حد بيسألنى علي عنوان في الشارع وأقول له معرفش بيبص لي بصه غريبه وكأنه بيدينى مهلة أراجع نفسي، ها مش عاوز تقول حاجة.
بعتقد أن الموضوع ليه علاقة بالجينات أكيد لو رجعنا بالزمن وشفنا الهكسوس وهم داخليين مصر مثلا وبيوقفوا مواطن مصري غلبان وسألوه علي قصر الحكم أيام ما كانت مصر كلها علي بعضها هرمين وقصر .. أكيد كان الرد التلقائي منه " هو قال لك فين ؟ ".
وفي مكان أخر من أرض مصر لما الأسكندر الأكبر وصول حدود الأسكندرية أكيد لقي مواطن مصري غلبان وسأله أحنا داخلين مصر طريقنا كده صح ؟؟ والأكيد أيضا بص ليه بصة خبرة وقال له " تعالي ورايه" .
أكيد ده راجع لتربيتنا من صغرنا فاكر لما أمك كانت بتقول لك وأنت نازل الأمتحان " ما تسبش حاجة في الورقة فاضية ، حل اللي تعرفه في الاول واللي متعرفوش سيبه للأخر ، حل أي حاجة متسبش حاجة فاضيه " لحد النهارده مش قادر أفهم أيه الفكرة بصراحة ، بس مش هقدر أنكر أن دى يمكن النصيحة الوحيدة لامى اللي أستخدمتها أكثر من مرة بس فيهم مرة مش ممكن أنساها ودى كانت أكبر فتوى في حياتى ..
كنت في أمتحان الأنجليزى في أولي أعدادى وكنت فاشل جدا فيه وبكرهه كره العمى فقعدت أقلب في الأسئلة مش فاهم حاجة لحد ما لقيت سؤال عبارة عن محادثة بينى وبين واحد أسمه جون بيقول لي كلام والرد بتاعى موجود مكانة فراغ وأنا أكمله فقرأت كل حاجة أنى أفهم كلمة واحدة .
بالشبه كده عرفت أنه بيسأل علي عنوان مكان وفي أخر الجملة بيقول لي thank you والمفروض ارد عليه . مش محتاج تتخيل منظري ساعتها لو فاكر منظر حسن شحاته وهو بيقول " ياحبيبي يا رسول الله " وبيعيط من الفرحة . كنت نفس الوضع بس في مشكلة حصلت من فرحتى نسيت المفروض أرد عليه وأقول له أيه بالانجليزى ؟؟؟.... أهدى كده يا محمد وركز ولو هترد عليه بالعربي هتقول له أيه وأقلبها انجليزى ركز دا أسها سؤال في الامتحان ... ممممممممم ياترى أقول أيه؟
نسيت كل حاج ومجاش في بالي غير رد واحد " لا شكر علي واجب " طبعا دا رد مناسب لو أنت و جون قاعدين علي قهوة بتخمسوا في حجر معسل ، بس هو دا اللي حصل ودماغي قفلت علي كده .
طبعا أنا متخيل بتسأل نفسك دلوقتى انا كتبتها أنجليزى أزاى ؟ فكر كده شويه ، أسرح بخيالك .. ايووووووووون no thanks for amust لا شكر علي واجب وأهم حاجة الثقة في النفس وبصراحة كنت محتار أكتب كلمة واجب must ولا work لأنى بصراحة كنت حاسس أن السؤال فيه خدعه علشان يفرق بين الطالب المذاكر واللي مش مذاكر .
كان ناقص أكتب له " تعالي أشرب شاي يا جون "