فرحة أهالى الجيزة بتغيير المحافظ: «كسرنا وراه قلة»

«لو طُلت قلة كنت كسرتها وراه».. قالها بملء فمه، وهو يتابع أداء المحافظين الجدد اليمين الدستورية أمام الرئيس السيسى، ومن بينهم محافظه الجديد الذى أزاح سابقه د.على عبدالرحمن عن كرسى محافظة الجيزة بعد 4 سنوات من بقائه فيه وبقاء الحال فى المحافظة على ما هو عليه إن لم يكن أسوأ. الفرحة التى انتابت أحمد عبدالفتاح -أحد سكان الهرم- غادرته لغيره من الأهالى، ممن عانوا تجاهل المحافظ السابق لمعاناتهم مع الطرق والقمامة والأزمة التى يعانيها كل سكان المحافظة دون استثناء، بحسب تأكيده. «مفيش أى إنجازات عملها، وفى كل مرة كان هو الوحيد اللى مبيتغيرش»، قالها الرجل الأربعينى، مؤكداً: «محدش كان بيشوفه فى الشارع فى أى حاجة بتحصل، عدا علينا أيام كنا كل يوم نكتشف قنبلة جنب بيوتنا والإخوان فى مسيرات فى الشوارع ومطلعش مرة اتكلم ولا نزل شاف بنفسه ولا يعرف أى حاجة عن الناس اللى عايشة فى محافظة هو المسئول عنها، المرة الوحيدة اللى فرحنا فيها من يوم ما ممسكنا إنه مشى، ورحمنا من إهماله». الفعل الذى لم يُتَح لـ«عبدالفتاح» أقدم عليه أيمن محمد، صاحب محل ملابس فى الطالبية: «من فرحتى، رميت وراه قلة كنت حاططها قدام المحل»، معبراً عن سعادته بتغيير محافظ منطقته لسلبياته فى تلك الفترة: «مكانش مهتم إلا بشارع الهرم وفيصل وكله بعد كده عبارة عن عشوائيات، بقالى كتير عايش فى الطالبية وعمرها ما كانت بالشكل ده»، أضاف ساخراً: «هو استخسر فينا الاهتمام، بس أنا ما استخسرتش القلة اللى حطيتها قدام المحل عشان الناس تشرب منها، وكسرتها وراه.