«مرور حدائق الأهرام».. شباك لكل مواطن و«مفيش رشوة»

مقاعد مريحة، شبابيك مخصصة، ومنظمة، نظافة على أعلى مستوى، هكذا تبدو وحدة مرور حدائق الأهرام الجديدة أسفل محور «اللبينى»، التى انتظر «طارق» بداخلها أقل من نصف ساعة، لتجديد رخصة سيارته، وعبر عن شعوره بسهولة الإجراءات للمرة الأولى قائلاً: «كأنى فى بلاد بره». بعد معاناة كان يستغرقها الرجل الخمسينى بالساعات فى وحدة مرور فيصل، أصبح الوضع مختلفاً بمجرد زيارته الأولى لوحدة مرور حدائق الأهرام الجديدة، التى امتازت بالإيجابية فى كل شىء، حسب وصفه: «كل واحد قاعد فى حاله والكراسى مكفية الناس، تاخد رقم تستنى دورك وتمشى وكل ده فى نص ساعة، ومن كتر النظام مفيش أى رشاوى فى المكان زى اللى بنشوفه فى كل حتة عشان نخلص مصالحنا»، التنظيم، وأرقام الشبابيك وتخصصها من أكثر الإيجابيات التى لاحظها «طارق» فى رحلة تجديد رخصة سيارته بالمرور الجديد: «أول ما أخدت الرقم مكملتش دقايق وبقيت على الشباك لوحدى، مفيش حد يقف فى ضهرك زى اللى بنشوفه فى وحدات المرور، والكل ملتزم فى دوره، لأن فيه 10 شبابيك وكل واحد له وظيفة، اللى بيستلم واللى بيسدد مخالفاته والمعاملة من الموظفين طيبة جداً». الإيجابية التى شاهدها «طارق» فى وحدة مرور حدائق الأهرام الجديدة، تمنى أن يراها فى كل المصالح الحكومية، «يا ريت نشوف الإيجابية دى فى كل مكان فى مصر، لأن كل ما يبقى فيه التزام ومعاملة كويسة إحنا هنلتزم كمان بدورنا حتى لو فضلنا ساعة منتظرين، المهم إن يبقى فيه نظام».