بعد زيادة أسعار السجائر.. عم سيد: كل حاجة في البلد غليت إلا البني آدم

قرار الحكومة بتوجيه 5 مليارات جنيه إلى القطاع الصحي عقب فرض ضريبة جديدة على السجائر، لم يشغل بال كثيرين.. لم ينتبه غير المدخنين إلى تلك القرارات، بينما جثمت زيادة أسعار السجائر على صدور المدخنين ومنهم سيد جاب الله، الذي لم يقلع عن التدخين بسبب الزيادة مبررًا ذلك بدعم اقتصاد الدولة. "طول ما الدولة بترفع الأسعار وتبرر الزيادات بخوفها على الشعب.. إحنا كمان هنعمل نفسنا بنخاف على الدولة و هنشتري سجاير زيادة".. قالها الرجل الأربعيني غاضبًا وأضاف: "يعنى السجاير اللي الواحد كان بيطلع فيها غلبه من العيشة واللي عايشنها كمان غليت، الواحد خلاص زهق". يودع "سيد" سيجارته تحت حذائه، ويبعثر "النفس الأخير" في الهواء غاضبًا، "زمان كانت السجاير أرخص حاجة في البلد، دلوقتي كل حاجة بتغلى إلا البني آدم"، ويضيف: "لو الضرايب هتروح على الصحة، لازم نعرف على أي القطاعات". من الصعب على عم "سيد" الإقلاع عن التدخين، حيث إنه لم يقلع عنها في أصعب وعكاته الصحية: "لو مت عمري ما أبطل سجاير، بقت إدمان مش ممكن نبطلها عشان زيادات في الأسعار طبعًا".