مواطن ينشئ "ملاهى" مجانية فى حديقة فيلته
«زحليقة، بيت الكور، نطاطة» ألعاب هوائية للأطفال شغلت مساحة كبيرة من حديقة الفيلا، مخلفةً ضحكات من القلب ونظرات بريئة للرجل الخمسينى الذى بات وكأنه «سانتا كلوز» المريوطية. منتصر أحمد، 53 عاماً، شاء القدر أن يُرزق بالمال، ويُحرم من البنين، ففكر فى تخصيص جزء من حديقة فيلته الراقية بالمريوطية، للترفيه عن الأطفال الفقراء الموجودين فى المنطقة مجاناً. «بقالى 23 سنة متزوج، وربنا مرزقنيش بأطفال، وبعد وفاة أخويا ربيت أولاده كأنهم أولادى لحد ما كبروا، بس طول الوقت كان عندى إحساس إنى مسئول عن سعادة كل الأطفال، عشان كده فكرت أستغل جزءاً من الفيلا لإسعادهم، وعملت ليهم ملاهى مفتوحة صبح وليل من غير أى مقابل»، وفقاً لما قاله «منتصر». حراس العقارات المجاورة لفيلا «منتصر» ساعدوه على نشر خبر وجود ملهى فى المنطقة إلى أن علم الجميع بالأمر: «بدأت بأطفال البواب عندى، ومن بعدها بقى كله يبلغ بعضه، وعامل ليهم بوابة خاصة يدخلوا منها ويخرجوا على الجنينة على طول من غير ما حد يضايقهم ولا يضايقوا حد، وأحياناً لما بخلص شغلى بدرى بدخل وألعب معاهم كمان». الألعاب البسيطة التى وضعها «منتصر» داخل حديقة فيلته، أدخلت السرور على قلوب أطفال بائسين، كانوا يفتقدون وجود شىء يسعدهم: «فكرتى من البداية هى عمل الملاهى الخيرية للأطفال اللى محتاجين يفرحوا وأهاليهم على قد حالهم، عشان يحسوا إن زيهم زى غيرهم».