بالفيديو| المصريون في يوم اليتيم: "احتفال إيه بس..إحنا كده بننكد عليه"

رغم شعور الوحدة وفقد بريق الأمل في وجود سند في الحياة، فإن العالم يتذكره دائما ولا يستطيع أن يتناسى أول جمعة في شهر أبريل ليحتفل بـ"اليتيم"، لكن في الوقت الذي يحتفل فيه العالم بهذه المناسبة إلا أن البعض ينتقد تسمية اليوم بـ"اليتيم". "المفروض ميكنش في يوم اسمه اليتيم، إحنا عايشين في أرض واحدة ليه نصنف بعض"، كلمات عبر بها فادي أشرف مغني عن رفضه لمسمى "اليتيم"، واتفقت معه داليا محمد، قائلة "نحتفل بإيه بس.. إحنا بنكد عليه، مينفعش أنسى السنة كلها وأزوره في يوم بس". تقول عايدة عبد الحميد "مش عاجبنى، لأنه بيفكر الطفل بوجعه، وبيفكره بأهله، وبيفضل الطفل يسرح في عيون الناس يدور عن أمه وأبوه". دموع آمال سليم سبقت كلماتها "أنا مبخلفش، بحتفل في اليوم دا مع الأطفال عشان أعوض عطشي، نفسي يبقى إسمه (يوم الأم البديلة)". "ممكن نسمية يوم التضامن أو يوم المصريين".. كان اقتراح وليد خالد طالب لاسم آخر غير يوم اليتيم. وعن إحساس الطفل بتسمية هذا اليوم، قال إبرهيم محمد طلبة "بنحسس الطفل بالحاجة اللي المفروض بندويه منها وهي الحرمان من الأهل". وقالت مريم سمير "ليه نسميه يوم اليتيم لما ممكن يكون يوم المصريين"، لكن الحاجة سميرة علي ابتسمت قائلة "مش مهم الاسم المهم الناس تتبرع للأطفال".