ضحايا "المستريح" أمام "القضاء العالى": "نهب شقا عمرنا وضيع أراضينا"

وجوه شاردة ومصدومة، جاء أصحابها من أقصى الصعيد والدلتا والقاهرة الكبرى للبحث عن أموالهم الضائعة، بعد أن تعرضوا لعملية نصب كبرى على يد شخص يُدعى «أحمد المستريح». مئات المواطنين الحالمين بالثراء السريع والمريح، تجمعوا أمام دار القضاء العالى لتقديم بلاغات ضد «النصاب» الذى اختفى تماماً، وامتنع عن الرد على مكالماتهم الهاتفية. ويقول أحمد عبدالرازق من محافظة قنا: «90% من أهالى المحافظة دفعوا فلوس للمستريح واتنصب عليهم، أنا دفعت له شقا عمرى فى السعودية 25 سنة، 150 ألف جنيه، لما شفت الناس كلها بتدفع له وبتاخد الأرباح، وبدأت الشغل معاه من 6 شهور وأخدت أرباح على 3 شهور بس، وبعد كده بدأت المماطلة والتهرب، فيه ناس كتير فى المحافظة بيوتها اتخربت بعد النصب عليهم، وفيه 3 ستات كانوا دافعين له فلوس واتطلقوا، وفيه واحدة جالها جلطة وماتت بعد ما المستريح أخد منها مليون جنيه، أنا دافع له 30 ألف جنيه بس وابن عمى 80 ألف لكن فيه ناس فى بلدنا دفعت له 5 و10 ملايين جنيه، وفيه ستات غلابة باعت دهبها والجاموسة بتاعتها اللى كانت بتصرف على البيت». ويضيف «عبدالرازق» قائلاً: «المستريح ورجالته أغروا الأهالى البسطاء بالأرباح والفوائد الشهرية المرتفعة، وتسببوا فى بوار الأراضى الزراعية، وارتفاع أجرة الأيدى العاملة للضعف، وانهيار الزراعة فى الصعيد، أنا قابلت المستريح 3 مرات كنت بحس فيهم إنه واصل جداً ويعرف كل القيادات، وأقنعنا إن مصنع الأسمدة المزعوم بتكليف شخصى من المهندس إبراهيم محلب وتحت رعاية الرئيس عبدالفتاح السيسى، عشان كده الناس صدقته ودفعت دم قلبها وشقا عمرها له». ويقول محمد فتحى من القاهرة: «أحمد المستريح نصب على الناس فى الإسكندرية والقاهرة والدقهلية ومحافظات تانية كتير، وكان بيقول إنه بيتاجر فى كروت الشحن وهو من قرية دندرة بقنا، وعيلته فقيرة وتبرأت منه ومن أعماله وليس مهندساً كما يقول عن نفسه، هو خريج كلية الخدمة الاجتماعية، النصاب العالمى كان بيقنع الناس إنها تبيع أراضيها ومواشيها وكل ما يملكون لتحقيق الثراء السريع والمريح فى نفس الوقت، وكان يقول للفلاحين الغلابة: أنت معاك فدان أرض، هيجيب لك فى السنة 5 آلاف بس، إنما لو بعته بـ300 ألف جنيه هتكسب 30 ألف جنيه كل شهر، وبدون ما تتعب نفسك فى الزراعة والفلاحة، ولو معاك جاموسة هتكسب فيها بعد العلف والأكل بتاعها 1000 جنيه إنما لو بعتها بـ10 آلاف جنيه هتكسب 1100 جنيه كل شهر وأنت حاطط رِجل على رجل، الفايدة العالية هى اللى خلت الناس تجرى وراه وبدل ما ياخدوا الأرباح يحطوها فى جيوبهم كانوا بيدفعوها له تانى عشان يستثمرها، كانوا بيقولوا هنتعب ليه طالما المستريح بيشغل فلوسنا وإحنا مستريحين».