"هوس الأبراج".. برجك إيه؟ بعد كده نتعرف

كثير من الفتيات لديهن "هوس الأبراج" والربط بين الشخصية والبرج الذي ينتمي إليه، والحكم عليه مسبقًا قبل التعامل فعليًا. "بسأل عن البرج الأول بعد كده بتعرف على الشخصية"، تقول شيماء أشرف، التي تقتنع بأن التعامل مع أي شخص يكون على أساس البرج الذي ينتمي إليه، لاقتناعها بأن الأبراج والصفات التي يحملها الشخص، تتحكم بشكل كبير فيه بشكل كبير. وتضيف "شيماء"، "اللي خلاني أهتم بالأبراج، في ناس غامضة كتير بتقابلني في حياتي، ببقى عاوزة أعرفها، ولما بعرف برجها بقدر أفهمها بسهولة، وبتساعدني بشكل كبير في التعامل". من الممكن أن تقاطع "شيماء"، أشخاصًا في حالة عدم اقتناعها بأبراجهم، توضح قائلة: "في أبراج بقفل من أصحابها ومبتعاملش معاها، لو معجبنيش برجهم، حتى لو هما كويسين". من وجهة نظر "شيماء" هناك شخصيات تنتمي لأبراج لا تفضل التعامل معها، لوجود بعض الصفات التي تكرهها، تصنفها شيماء، قائلة: "من الأبراج اللي بكره التعامل معها، الجوزاء والعقرب، لأن أسوأ حاجة في الجوزاء الازدواجية وتلاقيهم شخصيتين في بعض وعكس بعض، والعقرب بكره فيه انتقامه وأنانيته وحبه لنفسه". وهناك أبراج أخرى تحب التعامل معها، منها القوس والجدي والعذراء، "بحب برج القوس علشان وفائه وصراحته ومبيحبش اللف والدوران، وكرمه، والأسد زيه وكمان رومانسي"، وتضيف، "بحب برج العذراء علشان غيرته واهتمامه بالتفاصيل، وبرج الجدي علشان دقته وجدعنته". اهتمام "شيماء" بالأبراج وصفات الشخصيات التي تحملها ليس له علاقة بـ "حظك اليوم"، التي تنشر في الصحف، تقول، "حظك اليوم بالنسبة لي تخريف بنسبة 90%، ولو حصل فعلًا بيبقى صدفة مش أكتر، ونسبتها 10%". بمجرد أن تتعرف إيمان محمود، على شخصية جديدة، وتعرف البرج الذي ينتمي إليه، أول ما تفكر فيه الاستعانة بمحرك بحث "جوجل" لمعرفة صفات البرج، تقول "أول ما اتعرف على شخصية وعاوزة أفهمها، أعمل سيرش عن الشخصية وصفات برجها، زي ما يكون بذاكرها". وتضيف، "أكتر الأبراج اللي بحب أتعامل معاها هي الدلو والميزان، لأن الدلو شخصية طيبة، والميزان برج عقلاني وتقدري تاخدي برأيه"، وتضيف، "مبحبش برج العذراء لأنه متردد ومبيقدرش ياخد قرار". اهتمام إيمان بالأبراج ليس فقط بصفات البرج، وإنما أيضًا "حظك اليوم"، "دي أول حاجة بعملها إني لازم أعرف يومي النهارده هيبقى إزاي، لإنه دايما بيبقى صح".