الخوف

الخوف.. عمرك فكرت إيه هو الخوف؟ ولا ليه بتحس بيه؟ و ليه كمان بتكره الإحساس ده؟..رغم إنك المسؤول عنه؟ الخوف هو رفضك لفكرة معينة.. حاجة خطرت على بالك وبتمثلك خطر في حياتك.. أو حتى بعدها. الخوف هوه اضطرابك لما تفكر إن ممكن تجربة معينة تمر عليك وتدمرك!!.. الخوف.. هو تخيل لأحداث تكسرك من جوه.. أحداث تأثر عليك وعلى اللي حواليك.. الخوف هو رفضك لفكرة الفشل.. هو رفضك إنك تفقد ناس بتحبها.. الخوف هو.. الخوف هو انت.. هو ببساطة طبيعة ربنا خلقها للإنسان علشان يفكر قبل ما يعمل أي غلطة.. قبل ما يقرر أي قرار. الخوف هو إحساسك إن الدنيا ضلمت فجأة من حواليك.. إنك محبوس في أفكارك اللي كلها ضدك.. أفكارك اللي هي أصلًا خوفك.. الخوف هو مؤشر.. كتير بيبقى كداب.. كتير ممكن يقلب عليك.. ممكن يمنعك إنك تعيش أصلًا. الخوف ساعات بيتحكم فيك لحد ما يقضي على إرادتك علشان مجرد "قلق" من حاجات لسه محصلتش.. حاجات ممكن - أيوه ممكن - تحصل.. زي الكرسي الهزاز اللي مش بيوديك لمكان.. بيحركك بس واقف بيتهز في مكانه.. خاف.. أنا عايزاك تخاف. [SecondImage] بس خليك متحكم في الخوف ده.. خليه عامل زي المنبه بتاعك اللي بيصحيك من النوم لما تنعس بس برضه خلي عندك القدرة إنك تقفل المنبه.. أو تأجله لحد الميعاد الصح.. لو خفنا من كل حاجة مش هنعيش.. مش هنعمل أي حاجة نفسنا فيها.. خاف.. خاف بس من غير ما تخاف.