الاحتفال بسيناء فى "القناة": "شهر فى حب مصر"

رغم الظروف الأمنية غير المستقرة التى كثيراً ما تفسد فرحة المصريين بأعيادهم الوطنية، قرر شباب المنصورة تخصيص يوم السبت من كل أسبوع على مدار أبريل، للذهاب لموقع حفر قناة السويس مع طلاب المدارس وأولياء الأمور، للاحتفال بعيد تحرير سيناء دون خوف من التفجيرات التى يقوم بها الإرهابيون، تحت شعار «شهر فى حب مصر». وسط الجنود والعمال، وقف محمد قمر، أحد منظمى الرحلة، وأولياء الأمور وأبناؤهم، يستمعون لشرح تفاصيل حفر قناة السويس: «هدفنا إننا نحتفل وسط العمال وندعمهم، وعشان يبقى معانا أكبر عدد من طلاب المدارس وأولياء أمورهم، فكرنا ما تكونش مقتصرة على المدارس فى المنصورة بس، واتفقنا مع مدارس فى القاهرة من أكتر من منطقة». يسعى الشاب الثلاثينى وفريقه إلى تجميع أكبر عدد من المدارس، لبث روح الوطنية فى الطلاب: «طلعنا برحلتين لحد دلوقتى لمدرستين، بنقعد من أول اليوم نزور فيه حفر القناة وفيه جنود بيشرحوا لينا أهم إنجازاتهم، وفى نفس الوقت بنقضى معاهم يوم جميل». «متحف العدو الإسرائيلى».. من أهم الأماكن التى زارها محمود أحمد، ولى أمر، فى الرحلة: «إحنا زُرنا مكان الحفر وفرحة العمال وعساكر الجيش بينا ما كانتش تتوصف، وكنت فرحان جداً بالزيارة عشان ولادى شافوا حاجات كتير كانوا بيشفوها فى التليفزيون بس».