متسابقة "مذيع العرب" بعد خروجها: "حذفوا ردودي.. وكنت في مكان مش مكاني"

نشرت آلاء جاويش، بيانًا عبر حسابها على "فيس بوك"، تؤكد فيه الظلم التي وقع عليها ببرنامج "مذيع العرب"، والمُذاع على فضائية "الحياة"، وكشفت عن بعض الأمور بالبرنامج، ولا سيما بعد أن حذفوا بعض التعليقات الخاصة بها، في حلقتها التي علق فيها طوني خليفة، أحد أعضاء لجنة التحكيم، قائلا: "فيكي توصل رسالتك والناس كلها تتحمس بطبقات صوت هادئة دون انفعال مصطنع". وقالت جاويش، في بيانها: "الكلام ده كان لازم أقوله عن الحلقة الرابعة في برنامج مذيع العرب أولا عشان أوضح اللي حصل، وعشان كمان أقول الحمدلله، أولا: ممكن أكون كان صوتي عالي فعلا في مشاركتي.. ممكن يكون من حماستي لأن فيه جمهور ومسرح مش إستديو عادي، وممكن يكون عشان أكسب ثقة". وأضافت: "طوني لما قالي على الصوت العالي أنا رديت وقلت له إني متحمسة وده برنامج موسيقى على مسرح فإتحمست، ردي اتشال في المونتاج زي ما تعليق منى أبو حمزة اللي قالت إني كنت مرتاحة كتير وأنا بتكلم ما اتشال هو كمان مش فاهمة ليه، هل لما يشيلوا الكلام اللي اتقال هيبان إنهم حقانية ومابيظلموش حد؟". وأكدت في بيانها: "لما طلعنا كلنا المجموعة الأولى، وجه دور طوني، أعطى تعليقًا للكل عن إنه ليه مش هيدي المايك إلا أنا، وكان بيبصلي ومبتسم، وبرده الجزء ده اتشال، وطلع إنه بيكلم كله ومجابش سيرتي أصلًا، كنت هواء واقف على المسرح". وتابعت: "بعد التصوير، مقدرتش أتمالك أعصابي وبكيت في الكواليس على جنب ولصقت وشي في الحيطة عشان محدش يشوفني، لمحت كاميرا جت بإضائتها تصور، وقربت وشي أكتر في الحيطة عشان متصورش، وفجأة لقيت رأس طوني طلعالي من الجنب بالبابيونة اللي كان لابسها، فبصيت له لقيت الكاميرا جيه، قلتله: هما جايبين حضرتك عشان تصوروني وأنا بعيط، قالي لا والله أنا رايح آكل". وأوضحت، "قلتله اتفضل حضرتك روح كل، قالي إنت بتعيطي ليه بس؟ قلتله لأن حضرتك عارف الإعلام في مصر عامل إزاي من الواسطة، وأنا بقالي سنين طويلة بدور على فرصة، وكنت فاكرة مذيع العرب هيعطيلي الفرصة دي، لكن للأسف كله بالواسطة بيمشي، قالي ما تزعلي، أكيد هتلاقي فرصة أحسن، وشد على إيدي جامد والكاميرا اللي بتصور كانت مشيت". وفي هذا السياق قالت متسابقة "مذيع العرب": "الصراحة مش عارفة ده معناه إيه، ومعرفش هو جيه يكلمني عشان عايز يكلمني ولا كله بيمثل عشان التصوير". وأضافت: "رابعًا وده الأهم لما رجعت بلدي، وزرت عمة زوجي لقيتها بتقولي أنا حلمت بمامتك يوم الثلاثاء الصبح، وده نفس اليوم اللي صورنا فيه الحلقة الرابعة بالليل"، حلمت بمامتك بتطلب مني أقولك متزعليش وأنا بدعيلك، بكيت لما حكتلي الحلم وإنها محبتش تقولي الحلم ده وأنا مسافرة قبل التصوير، الصراحة حسيت بطمأنينة غير عادية، هو أنا ممكن أطلب إيه من الحياة غير إني أتمنى إن أمي حبيبتي تكون حاسة بيا وبتدعيلي وراضية عني، وقتها حسيت إن كنت في مكان مش مكاني، وإن بدعاء أمي أكيد هتيجي الفرصة الأحسن لي، اللي فيها الأخلاق والاحترام والأصول موجودين، مش المصالح والذاتية والأنانية الحمد لله". وأضافت آلاء، في تصريحات خاصة لـ"الوطن"، أن طوني قال إنه محتار بيني وبين أنوار، ودي كمان شالوها عشان ميبينوش أنهم مش عايزين مصريين تاني". وأكدت جاويش، أنه في الحلقة الثالثة التي ظهرت فيها في دور العروسة، أخبرها طوني بأن لديها خبرة، مشيرة إلى أن هذا كان تحفظه، وشالوها برضه لأنهم أعطوا المايك الأسود والفضي إلى آخرين لديهم نفس الخبرة.