طلاب «الإعلام» بجامعة القاهرة يتحدون الكآبة: «اضحك»
طلاب «الإعلام» بجامعة القاهرة يتحدون الكآبة: «اضحك»
البعض يرى أن السعادة أصبحت عملة نادرة، بل أوشكت على الانقراض فى وسط الظروف الصعبة التى نمر بها ودوامة الحياة.. فكر مجموعة من الشباب، لم تتجاوز أعمارهم الـ22 عاماً، أن يرسموا الضحكة على وجوه المصريين بمختلف الطرق الممكنة بأقل الإمكانيات وبدون مقابل.
مجموعة من طلاب «إعلام» يقومون بإعداد مشروع تخرجهم، نزلوا الشارع ونظموا الإيفتنس المختلفة ولعرض نوع من أنواع الفنون بهدف إسعاد الناس.
عبير عهدى -من أعضاء المشروع- تقول: «الفكرة جت لما فكرنا نعمل مشروع تخرجنا كان هدفنا نعرض شىء فيه احتكاك بالشارع، لما نزلنا الشارع بالفعل لقينا كل الأفكار سودواية لأن الشارع المصرى، خصوصاً فى الفترة الأخيرة، بقى بيسيطر عليه الكآبة نتيجة الظروف الاقتصادية والسياسية اللى بنمر بيها، فكرنا وتأملنا كتير وكلنا قلنا لنفسنا الشعب ده مش ناقصه غير إنه يضحك تانى من قلبه. وبالفعل فكرنا إزاى نعرف نضحكهم تانى حتى لو بأقل الإمكانيات».
وأضافت: «عملنا فعاليات كتير، هى فى الحقيقة لسه مش معلن عنها بسبب إن مشاريع التخرج بتتمتع بقدر من السرية إلا أنها حققت نجاح كبير جدا وأغلبها كان بيشترك فيها أهالى المنطقة فقط اللى بتتعمل فيها لكن ردود فعل الناس كانت شىء مفرح قوى، أهم إيفنت فى دول كانت حفلة لفرقة اسمها متروتون، دى فرقة بتعزف وتغنى فى المترو بس للأسف مكانتش بتقدر تمارس أنشطتها بسبب إن الشرطة كانت بترفض تساعدهم فى التصاريح، إحنا قدرنا نجيب تصاريح وبالفعل عملنا حفلة كبيرة فى محطة مترو الأوبرا، ردود فعل الناس كانت شىء إيجابى جداً، حتى إنهم بدءوا يسألوا عن الإيفتنس الجاية، وعن صفحتنا على الفيس وإزاى يتواصلوا معانا».
ينوى فريق العمل تطوير الفكرة فى المرات المقبلة حيث قالت عبير: «فى المرحلة الجاية إحنا نفسنا جداً نطور الفكرة متبقاش مجرد مشروع تخرج وخلاص، لا، نفسنا نعمل إيفتنس كتيرة ونوصل لكل فئات الشعب المصرى فى كل منطقة، بس طبعاً محتاجين دعم مادى لأننا تمويل ذاتى، الكلية بس مخصصة لينا 600 جينه، وبعد ما خلصوا بدأنا نلم من بعض، فإحنا محتاجين رسبونسر يساعدنا فى موضوع التمويل.. كمان إن شاء الله المرحلة الجاية هنعمل صفحة على فيس بوك باسمنا علشان نعلن عليها عن أجدد الإيفنتس بتاعتنا، وأى حد عنده فكرة علشان يسعد الناس يتواصل معانا فيها، وهيتم الاتفاق مع فرق كبيرة جوه مصر وخارجها وممكن نعمل عروض صامته وعروض تمثيلية ومسرحية ونحاول نتواصل مع الفنانين يساعدونا».
