شريف حسنى: لفينا قرى وكفور ونجوع والناس افتكرتنا حمامات متنقلة

عدد كبير جداً من الموهوبين لا يعلمون قدر موهبتهم أو لم يكتشفوها من الأساس، ومواهب أخرى لا تجد الفرصة الذهبية لتذيع أو تعرض موهبتها أمام الجمهور، طبقات مختلفة منها من لا يقدر على الذهاب لبرامج المواهب الكبيرة.. لكن تخيل أن تأتى أمامك الفرصة، أن تختارك هى دون أى جُهد منكَ؟ شريف حسنى، شاب ابتكر فكرة كُشك على هيئة مسرح لاكتشاف المواهب الحقيقية، هناك كاميرا و«مايك» لإذاعة ما قدمته، اختبار يجوب مصر بطريقة مختلفة وحكايات يرويها «شريف» فى الحوار التالى ■ عرفنا بنفسك؟ - أنا شريف حسنى (39 سنة)، استشارى شبكات ونظم معلومات، وصاحب فكرة برنامج «ذيع موهبتك».[SecondImage] ■ أشهر أعمالك السابقة؟ - برنامج «ذيع انتَ»، كشك بيتحرك وبيلف كل المحافظات، كان عبارة عن إننا بنسأل الناس فى الشارع سؤال معين «حل مشكلة المرور مثلاً» والمواطن يقول رأيه وفى النهاية بنقول له يعمل أى حاجة هو عايزها أمام الكاميرا سواء غُنا أو تمثيل أو يوصل رسالة لشخص. ■ كلمنا عن فكرة «ذيع موهبتك»؟ - الفكرة مستوحاة من برنامج «ذيع إنتَ» لأن وإحنا فى كواليس البرنامج كان فيه ناس بتقول لنا «ممكن نغنى؟»، وفعلاً بيطلع صوتهم حلو، قررنا ننزل بكُشك تانى ونلف بيه المحافظات، نوصل المايك للمواهب الحقيقية دى من غير بقى واسطة أو خلافه. ■ هل للمتسابقين سن معينة؟ - لأ، أى سن وأى مظهر وأى طبقة اجتماعية، كان فيه ناس فى إحدى المحافظات بتعوم فى الترعة طلعت لنا ودخلت الكُشك وغنت ولقينا أصواتهم رهيبة. ■ من المذيع وعلى أى أساس تم اختياره؟ - «جرحى» هو المذيع، هو اللى عمل الـ voice over لبرنامج «ذيع إنتَ» وبعد كده اشتغل فى كذا مكان منها برنامج «البرنامج» لباسم يوسف، غير إنه عنده حضور وهو أصلاً من الشارع يعنى ابن بلد هيعرف يوصل للناس فى الشارع بسرعة. ■ لماذا اخترت مواقع التواصل الاجتماعى لا التليفزيون؟ - لأن مواقع التواصل الاجتماعى أصبحت أكثر مشاهدة وأكثر وجوداً، مثلاً لو ضاعت عليك حلقة فى برنامج أو مسلسل ما هتفتح الإنترنت وتتفرج عليها لكن صعب تدور عليها تانى على التليفزيون، غير إن استخدام الناس للإنترنت أكبر من التليفزيون فى الوقت الحالى. ■ كم حلقة تم تسجيلها؟ - تم تسجيل عشر حلقات وكل حلقة فى محافظة مختلفة عن الأخرى، وتم إذاعة حلقتين. ■ من الحكم وكيف يتم التصويت للموهبة الرابحة؟ - الحكم هو الجمهور، بيقدر يدخل على الموقع بتاع البرنامج ويصوت للموهبة اللى شايفها تستحق. ■ على أى أساس بتدخل الموهبة تغنى فى الكشك؟ - قبل ما بندخل أى موهبة للكشك بنعمل زى اختبار صغير علشان نتأكد إن فعلاً الشخص موهوب ولا لأ، لأن العدد بيكون كبير جداً، بنعمل زى تصفية وبتكون الأولوية لأفضل أصوات، غير إننا بنعمل حاجة تانية وهى إننا بنقول للناس تدخل على الموقع وتسجل أصواتها قبل ما بنروح المحافظة والجمهور بيصوّت وأفضل صوت بياخد التذكرة الذهبية اللى بيدخل بيها الكشك من غير أى اختبارات. ■ ما الجوائز التى يحصل عليها المتسابق؟ - جايزة عبارة عن تسجيل فيديو كليب فى استوديو بشكل احترافى، وإحنا والموهبة الفائزة هنسوق للفيديو كليب ده سوا، بعد ما يكسب 10 مواهب من 10 محافظات مختلفة هيتم عمل حلقة تنافسية بين العشر مواهب والفائز هيكون له جايزة كبيرة جداً سايبينها مفاجأة لنهاية البرنامج. ■ مش شايف إن الفكرة قريبة من برامج المواهب على التليفزيون؟ - الفروق بيننا وبين برامج المواهب؛ البرامج دى بيتصرف عليها فلوس رهيبة وبيكون الحكم فى البرنامج من المشاهير بينما برنامج ذيع موهبتك اللى بيحكم فيه هو الجمهور.[ThirdImage] ■ كلمنا عن صعوبة فكرة البرنامج والتعامل فى الشارع؟ - الموضوع مش سهل طبعاً، نازلين بكشك متحرك وكاميرا وكده، لكن الناس لما بتعرف إحنا جايين نعمل إيه بتتجاوب معانا جداً، بيكلموا أصحابهم وأبناءهم لتقديم مواهبهم، لأن الكشك شكله لافت والمصريين بيحبوا أى شىء جديد وبيحبوا يجربوا. ■ كلمنا عن المواقف الغريبة اللى حصلت خلال التصوير؟ - مرة عيل حدف «جرحى» بطوبة فى محافظة المحلة فضربت فى راسه وخبطت فى الشاشة، غير الناس اللى بتسألنا «هو ده حمام؟»، وفيه اللى بيقول لنا أنا داخل جواه وبيطلع ورقة بعشرين جنيه يديها لـ«جرحى» أو ليّا. ■ ما الخطط المقبلة للبرنامج؟ - إن شاء الله يكون فيه «ذيع موهبتك مصر»، «ذيع موهبتك لبنان»، «ذيع موهبتك السعودية»، «ذيع موهبتك الإمارات». ■ ما هدفك من البرنامج؟ - إن كل الناس يبقى عندهم فرصة يظهروا مواهبهم، أذكر إن كان فيه واحدة دخلت غنت وصوتها كان حلو وهى أصلاً بتبيع فجل، ممكن «ذيع موهبتك» يغير حياة الناس دى.