المستشفى الجديد في طنطا يمنح "أم محمود" أمل علاج "صغيرها"

أرهقها جهلها بالفيروس الذي يحمله طفلها الصغير، وأتعبها انتظار الموت.. "كعب داير" على الأطباء والمستشفيات بعدد من المحافظات، لا أحد يريح بال "أم محمود" بما يحمله صغيرها من مرض، الكل اجتمع على أنه "فيروس نادر في المخ" دون أي تجاوب أو الوصول إلى نوعه بالتحديد. بمجرد سماعها عن افتتاح مستشفى طنطا التعليمي الجديد، أتاها الأمل بعد زيارة رئيس الوزراء المهندس إبراهيم محلب، لتسارع في نفس اليوم بتقديم أوراق طفلها "محمود" في المستشفى الجديد بمدينتها لعلها تحمل إليها الأمل. حالة من الفرحة والسعادة غمرت السيدة الأربعينية، بعد سهولة استقبال مستشفى "طنطا التعليمي" أوراق طفلها وإجراء الفحوصات اللازمة وحجزه، "بقالي 3 سنين بلف كعب داير على المستشفيات اللي بره طنطا بأوراق ابني ومحدش بيسعدني، الكل بيقولي ابنك ليه دور ودوره ده مبيجيش أبداً، بس مستشفى طنطا الجديدة من أول يوم فتحت روحت بابني حجزوه على طول من غير أي تعقيد"، الأم المغلوبة على أمرها تؤكد أن "محمود" – البالغ من العمر 5 سنوات – لم يشكُ من أوجاع رأسه فقط، بخلاف "شكشكة" الإبر، إلا أنه يعاني من تحديد الرؤية باتجاه عينيه اليمنى، "ابني كل اللي يشوفه يقولي إن عنده حاجة في مخه من غير أي تفاصيل، مفيش مستشفى روحتها إلا لما قالوا ليا إنه مرض نادر ويؤثر على الرؤية لدرجة أنه هيجي يوم عليه وميشوفش بعنيه الاتنين، ومن يومها مش يائسة وكل يوم في مستشفى عشان اشوف حل ويعالجوه". "أم محمود"، لم تتوقع الاستجابة السريعة التي لاقتها في مستشفى طنطا التعليمي الجديد، تروي لحظة الاستجابة لحجز طفلها المريض والمعاملة الحسنة التي شاهدتها من قبل الأطباء والممرضين، "من أول يوم روحت المستشفى وكان فيه ناس كتير ياما بتكشف على عيالها، وكل حاجة كانت بالدور والأرقام من أول الشباك اللي وقفت أقدم فيه ورق ابني، وبعد ساعة واحدة أخدوا ابني وعملوا ليه فحوصات وحجزوه ومدفعتش ولا جنيه لحد دلوقتي"، مضيفة "مكنتش فاكرة إن المعاملة هتفضل كويسة حتى بعد ما محلب فتح المستشفى ومشي، تاني يوم لقيتهم بيوزعوا على العيال بلالين وحلويات ولقيت اهتمام مش عادي، كفاية الدكاترة كل ما اسألهم على ابني عنده ايه يطمنوني ويقولوا ليا خير ويدوني أمل إن أكيد ليه علاج وهيبقى كويس".