شواطئ "بلطيم" بكفر الشيخ.. "مصيف بريحة المجاري"

رمال لونها داكن، مخلفات القمامة مختلطة بمياه الصرف الصحي، روائح كريهة تزكم الأنوف بدلًا من هواء نقي بطبيعة المكان.. مشهد مؤذي بأحد شواطئ "بلطيم" في كفرالشيخ، لم يصدقه أحمد جابر وأسرته، أثناء قضاء أسبوع "مصيف" في الإجازة كما اعتادوا كل عام في نفس "البلاج"، ليقفوا مندهشين في حيرة من أمرهم، "هنقضي بقيت الأسبوع إزاي؟". "مصيف بريحة المجاري".. ملخص ما عاشه "أحمد" وأسرته في الإجازة الصيفية على شواطئ "بلطيم"، فوسط مياه الصرف الصحي والقمامة، قضت العائلة إجازة ملوثة – حسب أحمد – لعدم مقدرته تغيير مكان المصيف بعد الحجز، "إحنا متعودين نصيف على طول في بلطيم، وكل سنة بيبقى البلاج فيه زبالة من المصيفين بطبيعة الحال، لكن مش لدرجة ميه صرف صحي على الشط، ولو كنت شوفت التلوث ده قبل ما احجز كنت محجزتش طبعًا". مياه زرقاء صافية أمامه ومياه المجاري خلفه، تارة يستنشق هواءً نقيًا وسرعان ما يتبدل الحال برائحة كريهة لم يتحملها.. مشاهد متضاربة، قضاها "أحمد" وعائلته أثناء فترة الإجازة على شواطئ بلطيم، "بقى البحر قدامنا والمنظر جميل جدًا وورانا زبالة ومجاري، وحاولت ادخل اكتر من بلاج لقيته بنفس الطريقة ومفيش ناس غيرنا، بعد ما كان شواطئ بلطيم مفهاش مكان لرجل في الصيف". المعاناة التي قضتها أسرة "أحمد" في أسبوع المصيف، يعيشها يوميًا مصطفى سلامة، أحد سكان بلطيم، "بقالنا فترة بنشتكي من المجاري في شركة الميه ومحدش بيسئل فينا، لحد ما بقت في معظم الشواطئ والريحة بقت صعبة أوي، يعني البحر قدامنا ومبقناش قادرين نقرب منه". محمد كامل، أحد أعضاء مجلس إدارة شركة مياه الشرب والصرف الصحي بكفر الشيخ، أكد أن مياه المجاري التي انتشرت على شواطئ "بلطيم" ناتجة من الكافيهات الموجودة على البلاجات، موضحًا: "حاولنا شفط مياه المجاري اكتر من مرة وتنضيف المواسير من انسدادها وبردوا بترجع تتسد تاني، لأن أصحاب الكافيتريات اللي على البحر بيرموا مخلفات بتسد مواسير الصرف فمن الطبيعي تضرب".