"حرامي نص الليل".. صبي حاول السرقة بالدقهلية فأوثقه الأهالي بعامود

ألقى أهالي قرية الدراكسة مركز منية النصر القبض على صبي لم يتجاوز عمره 14 سنة-حسب شهود العيان- وأوثقوه بالحبال وكتبوا على جبهته "حرامي" بعد أن اتهموه بالسرقة في الساعة الثالثة فجرًا. ونشر نشطاء على مواقع التواصل الاجتماعي صور الصبي وعليه آثار الضرب المبرح وينزف من فمه ومربوط من يديه ورجليه من الخلف في حائط حديدي، أمام مركز شباب الدراكسة الرياضي، وظهر أحد شباب القرية بجواره يلتقط صورة تذكارية وهو يرفع شارة النصر، ووصفه الأهالي بأنه "حرامي نص الليل" وقالوا "دا اتعمل أحلى واجب معاه وحفل استقبال (جلاشة) قبل تسليمه للشرطة". وظهرت حالة من الجدل الشديد بين شباب القرية فقال أحدهم " بصوا الحرامية ملهاش دية احلي حاجة انه اتمسك وياريت كانوا موتوه أحسن ويخلصوا البلد منة لأنه عاله على البلد والاشكال دي عاوزينها تخلص من البلد ولو مات محدش هيدخل السجن فيها ولو ثانية لأنه حرامي وممسوك وهو بيسرق يعنى ملهوش أي دية عند الشرطة ولا المجتمع مش يتبكى علية". وطالب آخر بعدم الاعتداء عليه وأن يتم تسليمه للشرطة وقال "أصبحنا أمة إذا سرق فيهم القوى تركوه وإذا سرق فيهم الضعيف أقاموا عليه الحد طب ده يمكن يكون بيمد إيده علشان مش لاقي، إنما كبار البلد إللى كرشوهم أوسع من نفق شبرا محدش يقدر يمد إيده عليهم شعب يخاف م القوى ويتشطر على الضعيف". وأعلن أحدهم معرفته للصبي وقال "ده فارس أنا عارفه عيل يتيم أبوه متوفى وأمه سابته وتجوزت ونينته ست محترمة أي واحد مد إيده عليه أسال الله أن يبترها له وحسبي الله ونعم الوكيل فيه وربنا ياخد بحقه منهم ده يا جدعان ملوش مكان ينام فيه بينام في الشارع حرام عليكم يا جدعان". وقال مصدر أمني لـ"الوطن" أنه لم يتم تحرير محضر بالواقعة في مركز شرطة منية النصر ولم يعلم بمثل هذا الحادث.