"السيسى" فى "الإسكندرية": "اخدم بلدك حتى لو هتتحبس"

قال الرئيس عبدالفتاح السيسى إن «كل مواطن لازم ينحت فى الصخر عشان بلده تقوم، لأن الناس وضعت مصر أمانة فى رقابنا»، وأضاف خلال افتتاحه ترسانة الإسكندرية البحرية، أمس: «عينك ما تشوف الغلط وتسيبه، حرام عليك لو شوفته وسكت، كفاية تجارب فى بلدنا، لم يعد هناك وقت للتجارب». وأضاف: «لو الموضوع وصل إلى درجة السجن عشان نخدم البلد اخدمها». وشدد الرئيس على «ضرورة مواجهة الفساد بمتابعة جيدة وحرص دائم، فى أى مؤسسة، بداية من المدير حتى أصغر عامل، وكذلك كل مسئول بالدولة»، موضحاً أن «الفساد لا يقتصر على مفهومه التقليدى، فالتكاسل فى العمل وعدم سيره بشكل سليم وعدم الإبداع والابتكار فساد»، وأشار إلى أن «الفساد يعطى إحساساً سلبياً للمواطن بأنه لا أمل فى المستقبل». وتابع الرئيس قائلاً: «عندنا مشاريع كتير كانت تعثرت، ومش مهم تعثرت ليه، وإزاى، بس المهم إزاى نستعيدها تانى»، وتابع: «لدواعى الأمن القومى، تقدمت القوات المسلحة لإنقاذ الترسانة البحرية، وكان لا بد ألا تكون خارج سلطة الدولة». وأضاف أن الدولة تسعى لوضع خطة لإعادة هيكلة المؤسسات المتعثرة خلال الفترة المقبلة، مؤكداً أن «التردد فى اتخاذ القرار يؤذى الكثيرين، وغير مقبول أن يكون هناك مسئول خائف»، وأضاف مبتسماً: «لو الموضوع وصل إلى درجة السجن عشان نخدم البلد اخدمها، مش ممكن كلنا هندخل السجن، وهو بلدنا ما تستحقش إننا نتأذى عشانها، أمّال الجنود اللى بتدافع عنها بروحها دى بيضحوا إزاى؟». وقال: «مش عاوزين نسمح بأن تكون هناك مؤسسات، سواء مصنع أو شركة، مش بتكسب، ولازم نفكر كيف ننجح»، وتابع: «على كل مسئول أن يرفع سماعة التليفون على المديرين اللى عنده، ويقولهم ماذا فعلتم، وكسبتم كام كل يوم».