طلاب كلية الإعلام بجامعة أكتوبر.. "من الكلية لعشماوي"

بملابس سوداء تعلوها قبعة غريبة الشكل وحبل حول عنق كل منهم، التف 8 بنات وولد حول لافتة افترشت أرض مدينة الثقافة والعلوم التابعة لجامعة أكتوبر، بصمت لا ينقطع، جعل زملاءهم يلتفون حولهم بفضول يشاهدون المشهد الذي منع الابتسامة من أن ترتسم على وجوههم من هول الموقف. توالت عليهم الأسئلة "إنتوا لابسين كده ليه؟ بتعملوا إيه؟"، حتى أن عمال النظافة أخذوا يستعيذون بالله ويرددون "إيه المشنقة دي ربنا يحفظنا"، مشهد طال في ساحة الجامعة جعل الطلاب الـ10 يقهقهون عاليا، مرددين "ده مشروع تخرجنا، وكنا لازم نبين للناس إحنا قد إيه تعبنا إننا نشتري الهدوم، ونتكلم مع عشماوي اللي طلع عالمعاش". "ورشة" جمعت بين الطلاب ودكتور أحمد بدر الدين المشرف على مشروع تخرجهم، يناقشون عدة أفكار انتهت بفكرة عشماوي، فذهب إليه الطلاب ومعهم المعدات يسألونه ما يخطر ببالهم ويلتقطون معه الصور، فيقول محمد عز الدين أحد طلاب المشروع "اتصورنا معاه ومع مراته، واتكلمنا معاه عن كل حاجه، وحكالنا أكتر قصة أثرت فيه، أما طلع حكم إعدام على صديقه ونفذه بنفسه، وقعد بعدها يعيط ويقوله سامحني عارف إنك مظلوم بس أنا عبد المأمور"، الفكرة التي وجدت شغفا عند الطلاب للتعرف عليه ومعرفة المزيد من المعلومات عن حياته، فتقول إسراء الجبالي إحدى طالبات المشروع "إحنا تعبنا عشان نوصله ونجمع عنه ومنه المعلومات، ده غير إننا أضفنا جوانب دينية ونفسية لشخصية عشماوي مفيش برنامج تاني تناولها"، مضيفة أن الوصول لملابس تشبه ملابس عشماوي وشرائها من مكان معين كان مجهودهم الشخصي، ليكون مشروع تخرجهم مميزا عن غيره.