ما تبقيش سندريلا.. خليكي كليوباترا

انا من جيل اتربى على قصة سندريلا اللي بتعيش خدامة لحد ما يجيلها الامير اللي يخليها اميرة، من هنا بدأ الفشل، طلعنا جيل بنات مالوش طموح ذاتي، كل همنا عريس الغفلة اللي هيحقق لنا الاحلام الوردية، استغنينا عن طموحنا واهدافنا وأعدنا تجربة جداتنا اللي كان دورهم في البيت بس، كل واحده فينا سابت فرص الشغل اللي ممكن تعمل لها كيان ومستقبل عشان ترضي ديك البرابر وتربي له العيال وتكون مجهزة الاكل قبل ما يرجع وتعرف تعمل عزومات لاصحابه واهله عشان يقولوا عليها ست بيت شاطرة، والنتيجة ان معظم الستات يا اما قعدوا في البيت بعد رحلة تعليم طويلة يا اما رضوا بالوظائف الحكومية عشان مواعيده مناسبه، والنتيجة ان في منتصف العمر بنات كتير من الجيل الفاشل ده اتصدموا بالواقع بعد ما العيال كبرت، العمر ضاع في تربية العيال مع ان كان ممكن تشتغلي وتوديهم حضانة عادي، بس انتي اللي استسهلتي عشان ابوهم بيصرف وخلاص، ودلوقتي زهقتي، نفسك تشتغلي، بس ماعندكيش خبرة ، غير في شغل البيت والطبيخ وتربية العيال، طيب نفسك تبداي من جديد، للاسف طلع بعدك عشر اجيال من نفس كليتك وهما اقرب منك لسوق العمل، طيب جوزك طلع ندل وطلقك ولا خانك ولا اتجوز عليكي، للاسف مش هتقدري تثوري لكرامتك لانك من غيره هتترمي في الشارع انتي وعيالك والمدارس الدوليه هتبقى لغات واللغات هتبق خاصة والخاصة هتبقى حكومة، طب نفسك تحسني مستواكي وتشتري عربية خاصة ليكي او تتنقلي لشقة اكبر، لا للاسف مش من حقك لان جوزك طاحن نفسه ليل نهار وجايب آخره من مصاريفك انتي وعيالك وانتي قاعدة نايمة بتاكلي من قتة محلوله، الخلاصة إحنا جيل ساهمنا بشكل كبير في انتاج مجتمع ذكوري بامتياز لاننا ضحينا بعلمنا و فرص شغلنا عشان رجالتنا هما اللي ينجحوا ويكبروا، انا مشبغلط اي ست وقفت جنب جوزها عشان يكبر ويبقى ناجح، بس ايه كان المانع لو انتوا الاتنين كبرتوا سوا،هتقولي لي الولاد، طب ايه المانع انكم كنتوا تحطوا الولاد في حضانة كويسة وتبنوا مستقبلكم سوا، طيب انتي جوزك طلع ابن حلال ربنا يبارك لك فيه، انتي يا للي جوزك غدر بيكي وحسيتي انك ضيعتي عمرك ع الفاضي اخبارك ايه دلوقتي؟؟ بتصومي وتصلي وتحفظي قرآن عشان ربنا يرفع عنك الكرب، جميل جدا، بس ماتنسيش ان ربنا امرك تتعلمي وتشتغلي وتعملي لنفسك ذمة مالية منفصلة، وتكتبي كل شروطك في عقد الجواز، انتي اللي فرطتي في حقوقك،عموما انا واحدة منكم.. هربي بنتي مش انها تكون سندريلا وتستنى الامير المنقذ..هربيها انها تكون كليوباترا اللي اصبحت ملكة وحاربت اقوى الممالك وحتى الموت هيا اللي اختارته ما استنتوش ييجي لحد عندها!!!!!