أطباء عن تدهور أوضاع المستشفيات: "الطب في مصر كالشحن على الطاير"

واصل عدد من الأطباء كشف الإهمال داخل المستشفيات، من خلال صفحة "عشان لوجه ميتفاجئش" على موقع التواصل الاجتماعي "فيس بوك"، وذلك بعد الزيارة المفاجئة لرئيس مجلس الوزراء المهندس إبراهيم محلب، لمعهد القلب واكتشافه الإهمال وتواجد القطط داخل المعهد. وعلق الدكتور "مصطفى. ا" قائلا: "عزيزي محلب ماتتفاجأش أو بالأصح بلاش تعمل متفاجأ، أنت عارف كويس إن ميزانية الصحة لا يمكن يتم بها إصلاح المنظومة الصحية وعارف أن كتير بيموت لقلة الإمكانيات وفي المقابل الطبيب المطحون بتديله كام ملطوش 1200 لـ 1700 جنيه وبيشتغل 12 ساعة 6 أيام في الأسبوع أقل حاجة". وتابع: "احترم أي دكتور يقرر الهجرة من البكابورت ده ويبعد عن الجهل والتخلف والسرقة اللي بقت أكتر من الهواء اللي بنتنفسه". وأضاف الدكتور "أحمد. أ": "أنا مش عارف الدكاترة غضبانين ليه ومتضايقين أنتو اللي غلطانين أنكم قبلتوا تمارسوا الطب في البلد دي والمستشفيات، أنا في حقيقة عرفتها بعد شغلي في مصر لمدة 10 سنين وفي أحسن مستشفيات في مصر مهما كان عندك ضمير ومهما كنت شاطر عمرك ما هتقدم خدمة طبية لعيان زي الخدمة اللي بتتمنى تتقدم لأبنك لو لا قدر الله مرض". وأضافت "غادة.أ"،: "رحنا نأخد ميعاد من مستشفى التأمين عشان والدي يعمل عملية ثالثة، بعد ما الكسر أتكسر لثاني مرة وبقى محتاج تغيير مفصل كامل ولكم أن تتخيلوا قدر الألم اللي بيعانيه مع أي حركة بسيطة، المستشفى أدتنا ميعاد بعـد 7 شهـور". وأستنكر "مصطفى. ا"، من تعليق أحد المحاليل على الحائط لطفل ويحمله والده لعدم وجود أماكن بالمستشفى قائلًا: "بيفكرني بأحد الفنانين الحكماء لما قال اشيلك على الماشي خد المحلول ولا جاشي، الطب في مصر كالشحن على الطاير".