"عبدالحميد" يشتري "خزين رمضان" بـ"نص الثمن".. "مفيش قوطة مفعصة"

زاد الحماس ونزل من بيته سريعاً بعد أن قرأ تصريحات للوحدة المحلية لمدينته دسوق بكفر الشيخ، عن تجهيز مقر لإنشاء شادر ومنفذ لبيع السلع الغذائية بأسعار مخفضة وبأقل من السوق 25%، لتناسب المواطنين تزامناً مع قدوم شهر رمضان، فأصيب "عبدالحميد عطا" بحالة من جنون الشراء، فالرجل الذي أنهكه ارتفاع الأسعار رغم قلة الجودة، قرر أن يشتري كميات كبيرة من الشادر لضمان "خزين بسعر أقل". "اللي تلاقيه النهاردة في الشادر متلقهوش بكرة في رمضان"، قالها "عبدالحميد" الموظف على المعاش وشبح غلاء الأسعار عالق في ذهنه، "مش ضامن الشادر يكون في رمضان موجود والشهر طويل وطلباته كتير"، فحاله الآن لا يسمح أن يشتري بأي أسعار متوفرة في السوق، راتبه بعد المعاش 800 جنيه، والابن الأكبر عاطل عن العمل، والمنزل الذي يسكنه آيل للسقوط، "بقيت أشتري كل حاجة على القد من وقت ما طلعت على المعاش والأسعار عمالة تزيد في كل حاجة حتى الخضار، ومش عارف ألاقيها منين ولا منين، فما صدقت سمعت عن الشادر اللي عملوه في البلد وفضلت أدور عليه لحد ما وصلتله ولقيت الأسعار كانت بنص تمن اللي بره". وسط الخضار والفاكهة بشادر بيع السلع الغذائية بالسوق القديم في شارع الغفران، وقف الرجل الستيني يشتري جميع أنواع السلع الغذائية بعد أن تأكد من تطبيق عبارة البيع بسعر الجملة للجمهور التي وجدها على لافتة الشادر، وأثارت فرحته، "منظر الخضار والفاكهة كانوا صابحين ومفيش قوطة واحدة مفعصة، ده غير إن لاقتهم بيبيعوا فيه كل حاجة من أول الخضار والفاكهة لحد البقالة والأسماك، وسعر القوطة فيه بجنيه ونص يعني أرخص من السوق كمان، فاشتريت خزين الشهر كله وبزيادة عشان مش ضامن الأسعار في رمضان هتبقى عامله إزاي، وكل الناس بقت تعمل زيي"، لم يصدق "عبدالحميد" في البداية أن السلع تابعة للمحافظة من جمالها، حسب وصفه، "كنت فاكر الأخبار اللي قريتها عن الأسعار اللي بنص الثمن في الشادر عشان يجيبوا رجل الزبون، لكن لما وقفت وأخدت دوري لاقيت الحاجة زي الفل وطازة وأسعارها قليلة"، موضح أنه حين تشكك في تبعية السلع لـ"المحافظة"، بسبب رخص ثمنها، أطلعه أحد الباعة على الصناديق المختومة من المحافظة، ومكتوباً عليها "تحت إشراف وزارة التموين"، "قلبي أطمن لما شوفت الأختام على الصناديق، واشتريت كميات تكفيني شهر وأكتر بأقل سعر".