أسرة مقاطعة: المسلسل البذىء يبان من عنوانه

كان «مروان»، 7 سنوات، يلعب مع أقرانه أمام منزله، سمعته والدته وكأنه يتشاجر مع زميله ويتلفظ بكلمات لم يعتدها، كان «مروان» وأصدقاؤه يقلدون مشهداً رأوه فى أحد المسلسلات، نادته والدته بصوت مرتفع: «تعالى هنا يا مروان.. إنت جيبت الكلام ده منين؟».. فيرد عليها: «من التليفزيون يا ماما». هذا العام ومع الانطلاقة القوية لمسلسلات رمضان، وما تحويه من مشاهد عنف وإباحية لا تليق بالشهر الكريم وبعادات وتقاليد الأسرة المصرية، قرر «مجدى محمد» وزوجته «هند فؤاد»، مقاطعة مسلسلات رمضان، بعد الحملة الدعائية التى تابعوها قبيل رمضان ومبررهم «الجواب باين من عنوانه». «مروان قاعد قدام التليفزيون بيسجل كل كلمة بيسمعها، ويرجع يتكلم بنفس الطريقة»، قالتها «هند» لزوجها محذرة إياه من متابعة مسلسلات رمضان هذا العام، خوفاً من تأثيرها على الأطفال خصوصاً ابنهم لأنه سريع الاستجابة: «إيه غادة عبدالرازق وإيه اللى بتقدمه ده هى وهيفاء وهبى اللى سابت الغنا ودخلت على السينما وبعدها على الدراما التليفزيونية، فين أيام فوازير نيللى وشريهان والكامير الخفية لإبراهيم نصر». تتكون أسرة «مجدى» من خمسة أفراد، الزوج يعمل موظفاً والزوجة ربة منزل، ولديهم ثلاثة أولاد، «مروان» 7 سنوات، أصغرهم، و«مازن» 14 عاماً، و«محمد» 20 عاماً، أما البنتان فتزوجتا، يشعر الأب أن كل ما بذله من جهد فى تربية أبنائه سيقضى عليه التليفزيون: «زمان كانت المسلسلات حلوة ونتعلم منها حاجة، دلوقتى أتفرج على إيه.. البلطجة والسلاح والعرى والألفاظ اللى بتخدش الحياء؟ أنا مش عايز الحاجات دى تنعكس على ولادى»، قالها «مجدى»، وهو يحكى لأولاده عن أجواء رمضان زمان، عن مسلسل الإذاعة «ألف ليلة وليلة» بصوت زوزو نبيل، وعن فوازير شريهان ونيللى ومسلسلات أسامة أنور عكاشة وإسماعيل عبدالحافظ وما تحويها من قيم وأخلاق. «من كتر افتقادنا للأعمال الفنية بتاعة رمضان زمان بندخل على النت عشان نسترجع ذكرياتها تانى».. قالتها «هند» متسائلة: «إيه المسلسل المناسب لرمضان دلوقتى؟.. للأسف مفيش». اختلف أفراد أسرة «مجدى» على برامج المقالب، ففى حين يرى الأب أنها سيئة وتسبب توتراً لا مبرر له، كما أنها سطحية وتستخف بعقول المشاهدين، يرى الأبناء أنها جيدة وفرصة للضحك والترفيه رغم علمهم بعدم صدق هذه المقالب المتفق عليها مسبقاً.