في أول بطولة مطلقة له.. موقف طريف جمع بين محمود حميدة والمخرج محمد خان

تحدث الفنان محمود حميدة، حول دور مساعد الممثل في اللوكشين، وذلك خلال ندوته بمهرجان الجونة السينمائي في دورته السابعة.

وقال محمود حميدة، «إن اللبيس هو النسخة الثانية من الممثل اللي بيطلع على الناس، وكان بيساعده زمان في إنه يقول الجمل على المسرح، ولكن الأمر تطور دلوقتي بقا دور المساعد أن يعمل على راحة الممثل».

أول بطولة مطلقة لفنان محمود حميدة

واضاف محمود حميدة «في أول بطولة ليا كان المخرج محمد خان والإنتاج كان عندهم مشكلة شوية، فاستغنيت على المساعد، وكان الدور كله بلبس واحد، فكنت كل يوم أروح واخد الشنطة، وكنا بنتجمع على القهوة لحد ماتيجي العربية تاخدنا كلنا وتودينا اللوكشين ودا كان فيلم فارس في المدينة، ودا الفيلم الوحيد اللي فاكر التصوير يوم يوم، لأني كان فيه مجهود كبير وأنا عندي مشكلة في ضهري وكل يوم كنت بشيل الشنطة بروح».

كواليس تصوير فيلم فارس في المدينة

وتابع «وفي مرة روحت لمدير الإنتاج قولتله أنا محتاج حد يساعدني عشان أنا تعبان وضهري وجعني، فقالي هروح أقول للأستاذ محمد خان، قولتله ياريت، وأول ماعرف محمد خان الموضوع اتعصب وقال هو من أولها هيعمل نفسه نجم».