لو عربيتك اتسرقت انشر صورتها على «فيس بوك» واخلى مسئوليتك

ما إن وقعت عدة انفجارات بسيارات مفخخة فى مناطق عدة، حتى قرر عدد من الشباب تدشين صفحة على مواقع التواصل الاجتماعى بعنوان «عربيات مسروقة»، ليضعوا فيها صوراً لسياراتهم التى سُرقت بالإكراه، حتى لا تشير إليهم أصابع الاتهام فى حال استخدام تلك السيارات فى أعمال إرهابية. «الصفحة عملناها بعد ما زهقنا من الداخلية اللى لا بتقدم أبيض ولا أسود، وحتى العربيات اللى رفعنا صورها ونمرها مارجعتش»، حسب أحمد عيسى، مسئول الصفحة، مؤكداً أن الهدف من تدشين الصفحة هو إخلاء مسئولية أصحاب السيارات التى فشلوا فى إعادتها، وأن الجماعات الإرهابية وغيرها تستخدم تلك السيارات لإلصاق التهمة بأشخاص أبرياء: «التقارير بتقول إن أغلب العربيات اللى استخدمت فى التفجيرات المفخخة مسروقة، ودى كارثة لو صاحبها اتاخد فى الرجلين». «الناس بتبعت لنا صور عربياتهم وإزاى اتسرقت عشان نرفعها على الصفحة، كلها قصص تقطع القلب وآخرها واحد الشرطة قالت له انت ماعرفتش تحافظ عليها، إحنا هنرجعها لك إزاى» قالها «عيسى»، مؤكداً أن فكرة الصفحة ربما لا تؤتى ثمارها، إلا أنها تعتبر توثيقاً من أصحاب السيارات يؤكد أنهم تعرضوا للسرقة حتى لا تتم مساءلتهم فيما بعد: «هدفنا نساعد الناس فى أنها تلاقى عربياتها المسروقة، ولو مالقتهاش، ماتلبسش مصيبة». «دى عربية واحد صاحبى اتسرقت النهارده بعد الصلاة من حلوان، وفيه ناس شافتها من شوية فى التجمع ومصر الجديدة بعد الفطار»، «العربية دى موجودة تحت كوبرى المريوطية بين شارع ترسا وشارع الثلاثينى بقالها فترة وشكلها مسروقة»، بعض الرسائل التى أرسلها أصحاب السيارات وأصدقاؤهم مصحوبة بصور السيارات، علهم يجدونها أو يجدون لها صاحباً.