غضب طلاب "تربية نوعية" بعين شمس بعد النتيجة..وهيئة التدريس: مش بيحضروا

سادت حالة من الغضب والاستياء الشديد بين طلاب الفرقة الثانية بكلية التربية النوعية قسم التربية الفنية جامعة عين شمس، بعد إعلان نتيجة امتحانات نهاية العام ورسوب نحو 50 % من الدفعة، علماً بأنهم عانوا من "نفس المشكلة" العام الماضي، حسب ما أكده العديد من الطلاب. وعبر الطلاب عن رفضهم لهذه النتيجة، مؤكدين أنهم قرروا التجمع والتظاهر أمام قصر الزعفران يوم الأحد القادم، للمطالبة بحقوقهم، فيما دشن عدد منهم هاشتاج باسم "#ظلم_نوعية" ليعبروا فيه عن استيائهم من النتيجة. وتقول فاطيمة.ز.ع إحدي طلاب الفرقة الثانية "إحنا من سنة أولى بنعاني من مشكلة إن عددنا كبير وده كان سبب في استياء الدكاترة مننا وسوء معاملتهم معانا وسقطت أغلب الدفعة في سنة أولى". وأضافت فاطيمة لـ"الوطن": "كل دكتور كان يدخل يقولنا إحنا مش عاوزين ندرسلكوا إنتوا عددكوا كبير جدا"، واستكملت "مشروعاتنا كانت بتترفض.. أنا اتقطعت في وشي اللوحة والدكتورة قالتلي قابليني السنة الجاية". وتقول الطالبة دنيا. ف "بعد النتيجة ما ظهرت في دكتورة كتبتلنا بوست علي الفيس بوك بتقول اللي هيجي يتكلم في الدرجات هياخد "بالجزمة" فوق دماغه". وأكد الطالب راضي فكري رئيس اتحاد طلاب كلية التربية الفنية بعين شمس، على دعمه للطلاب المتظلمين، مشيراً إلى أنه سيحضر مهم يوم الأحد في الاحتجاجات على النتيجة ليقدم شكوى إلى مجلس إدارة الجامعة. ومن ناحية أخرى، قال الدكتور عبدالرحمن جمال منصور، المعيد بقسم النحت التربية الفنية عين شمس، أن تظلمات الطلبة وادعائهم بظلم الدكاترة كلام ليس له أساس من الصحة، موضحاً أن كنترول الكلية ينفذ لائحة الجامعة التي أمرت برفع نسبة النجاح، وعبر عن ذلك بقوله" إحنا جالنا قرار إن نسبة الرفع لاتتعدى 2% فقط، بحيث تكون 22 من 50 هى درجة النجاح إحنا بننفذ لائحة الجامعة بس". وأضاف منصور لـ"الوطن" الطلبة اللي بتشتكي من السقوط مكنتش بتحضر وكشوفات الغياب بتأكد ان الغياب كان بيعدي 10 مرات للطالب الواحد". واستكمل قائلا "أنا كنت طالب 4 سنين في الكلية وفترة الماجستير عمري ما اتظلمت من أي دكتور، واللي شايف نفسه اتظلم يورينا شغله طول السنة".