"ليلة عيد".. قصيدة تحتفي بقناة السويس
ارسمي ليلك تهاني
وجهزي فستان جديد
النهاردة ليكي وقفة
بكرة صبحك لينا عيد
قبل ما يأذن أذانك
اصحي ياما من منامك
وافرشي الأزهار أمامك
وقت ما نزور الشهيد
انسي ماضي ليكي عدا
كان عذاب وكان الآم
شدي حيلك ياما شدا
صحصحي فينا الأمال
خلي وقت الراحة شدة
يلي أقوى من الجبال
التاريخ ماضي وعدا
وانتي باقية للزمان
يلي طيرك لما عدى
على البلاد مالقيش حنان
صمم الرجوع ليكي
ونام في حضنك في الأمان
يلي بذرك بالمودة
طارح الأيام سلام
انهضي دا الوقت عدا
وبطلي كتر الكلام
بكرة أحلى من النهاردة
والبلد بقيت تمام
حققي حلمك كفاية
حلمك الصاحي ينام
بكرة حلمك يبقي إيه
للي ظالم واللي خان
ارفعي ايدك لربك
وادعي للجيش الهمام
اللي كان في الضهر حارس
وفي الأمام طير السلام
ارفعي إيدك لربك
وادعي للجندي الشهيد
للي مات دايب في حبك
وكان بيحلم تبقى عيد