اديها ميه تديك طراوة.. شعار محلات الإسكندرية لمواجهة موجة الحر

03:10 م | الخميس 13 أغسطس 2015

رفع أصحاب المحال التجارية والكافيهات والمقاهي بالإسكندرية شعار "اديها ميه تديك طراوة" لمواجهة ارتفاع درجة الحرارة والرطوبة العالية وأشعة الشمس الحارقة، التي تشهدها البلاد خلال الشهر الجاري، وتسببت في وفاة وإصابة عدد من المواطنين بضربة الشمس.
فعندما تشد الحرارة في أوقات الذروة يعمد صاحب المحل أو العمال بالمقاهي والكافيهات على الكورنيش، إلى خرطوم المياه لرش الطريق أمام المحل للتخفيف من درجة الحرارة.
"زي ما إحنا كمان بنرش على نفسنا مياه علشان نفوق في الجو اللي ما يعلم به إلا ربنا ده، والشمس اللي ضاربة فينا، لازم برده نرش ميه قدام المحل علشان تخفف سخونة الشارع شوية والأسفلت ما يطلعش السخونية علينا، الميه ليها سحر من درجة الحرارة المرتفعة والجو النار اللي إحنا عايشين فيه"، هكذا علق الحاج سعد الدين محمد، صاحب أحد المقاهي بمنطقة الإبراهيمية وسط الإسكندرية، لـ"الوطن" على رش المياه اليومي أمام المقهى.
وأضاف محمد سالم، أحد العاملين بمحل حلواني بمنطقة كامب شيزار، "الميه بتخف شوية علينا الجو النار ده، الرصيف سخن، لازم نرش مياه علشان تخفف شوية درجة الحرارة دية، والمياه مش بتلحق بتنشف على طول علشان كده نضطر نرش أكثر من مرة في اليوم، خاصة في أوقات الذروة، خاصة وأن مفيش هواء خالص، عايشين في نار وسخونتيه".
ومن جانبه قال الدكتور مجدي حجازي، وكيل وزارة الصحة بالمدينة، إن سيارات الإسعاف تتمركز أمام شواطئ المدينة، وذلك لإسعاف حالات الإصابة بضربات الشمس، مؤكدًا علي ضرورة اتباع التعليمات التي أقرتها الوزارة حيال الموجة الحارة وتناول المياه بكثرة ورشها علي الوجه، وعدم التعرض بشكل مباشر ولمدة طويلة لأشعة الشمس خاصة الأطفال وكبار السن.