مواطنون: «محلب» كان شغّال لوحده والوزرا نايمين
مواطنون: «محلب» كان شغّال لوحده والوزرا نايمين
محمد
سادت حالة من الرضا بين المواطنين بعد تلقيهم خبر استقالة الحكومة التى تَقدّم بها المهندس إبراهيم محلب، رئيس الوزراء إلى الرئيس عبدالفتاح السيسى صباح أمس، واتفق عدد من المواطنين على ضعف أداء الحكومة خلال الفترة الماضية، ووجود وزراء لم يقدّموا جديداً، مع إقرارهم بالمجهود الذى بذله رئيس الوزراء.
موظف: حكومة عاملة زى اللى لابس بنطلون ضيق.. كل شوية يتقطع من حتة
وقال أسامة نصحى، 60 عاماً، إن الحكومة لم تؤدّ دورها على أكمل وجه، ولم تقدم شيئاً لحل مشكلات الصحة والتعليم والجهل المنتشرة بين المواطنين، ومشكلات النقل والمواصلات، ورغم أنه غير مُلِمّ بأعمال الحكومة بشكل دائم، فإنه يؤكد أن الحكومة كان يجب أن تكون أقوى من ذلك. وأضاف «نصحى»: «لازم يكون رئيس الوزراء هو القدوة علشان اللى شغال وراه يتحرك، وطول ما هو نايم اللى وراه هينام أكتر، والتراخى فى أداء الوزارات هو اللى جايبنا ورا».
ويتابع «نصحى»: «إيه اللى عمله وزير الرى والمجارى طافحة على النيل ومالهاش حل، والثروة السمكية اللى بتضيع؟ وأشيد بوزير الكهرباء، لأن الكهرباء مابقتش تقطع زى زمان، وفيه فرق واضح، و(محلب) ماكانش بيقعد وكان بيشتغل، لكن كان فيه ضعف فى الوزارات».
أما أسعد رسلان، 42 عاماً، موظف ببنك التنمية والائتمان الزراعى، فقال: «الحكومة الله يكون فى عونها فى الأول والآخر فى ظل الظروف اللى إحنا فيها، من ثورة لثورة، فمش عارفين الدنيا رايحة على فين، والحكومة عاملة زى ما تكون عندك بنطلون ضيق وكل ما تخيط فيه حتة، الحتة التانية تلاقيها اتقطعت». وأشار إلى أن من أهم المشكلات التى لم تجد لها الحكومة حلاً مشكلة الأمن، وفى أوقات الليل بعد صلاة العشاء لا يوجد أمن فى الشارع نهائياً، وأصبح المواطنون خائفين من السير فى الشوارع فى المساء، وإذا تم حل مشكلة الأمن فستكون خطوة لحل باقى المشكلات. وقالت ماجدة بشرى، 55 عاماً، مدرسة: «فيه وزراء كتير الناس متضايقة منهم وكانوا قاعدين لغاية دلوقتى، زى وزير التربية والتعليم، والمهندس محلب كان بيشتغل وبيبذل مجهود كبير، لكن بشكل بطىء، وكان شغال لوحده، واستجابة الوزراء لمتطلبات الشعب كانت بطيئة». وأشارت «ماجدة» إلى أنه توجد بعض المشكلات التى تم حلها، مثل مشكلة التموين والخبز، ومشكلة الكهرباء أصبحت تسير بشكل أفضل من الماضى، وبعض المشكلات التى لم تجد طريقها للحل، مثل مشكلة القمامة التى زادت بشكل كبير. وقال محمد أسامة، 30 عاماً: «للأسف إبراهيم محلب كان شغال لوحده، وباقى الوزراء كانوا نايمين، وده ظهر فى أزمات كتيرة فى الفترة اللى تولّت الحكومة فيها، وكان فيه مشكلات كتيرة مع وزارة التعليم العالى مع حَمَلة الماجستير والدكتوراه، ومن ضمن الوزارات اللى ماقامتش بدورها وزارة الصحة، لأن الإهمال منتشر بمستشفيات كتيرة».