«حمدون» أول مرة يمسك «رزمة فلوس»: «ماكنتش مصدق نفسى»
«حمدون» أول مرة يمسك «رزمة فلوس»: «ماكنتش مصدق نفسى»
يخرج من منزله البسيط فى الصباح الباكر كل يوم باحثاً عن قوت أولاده، إذ يعمل عامل نظافة فى أحد المحلات من أجل كسب الرزق الحلال. وفى أحد الأيام كان محمد حمدون، ابن قرية قلما التابعة لمحافظة القليوبية، عائداً من عمله بعد يوم شاق، ليتفاجأ بزحام شديد حول سيارة حمراء، ليجد نفسه أمام الفنان محمد رمضان الذى وجَّه له سؤالاً هو «اللاتيه بيتشرب؟»، فأجابه: «عمرى ما شربته» ليعلن فوزه بـ100 ألف جنيه ويُخرج «رزمة فلوس» من جيبه ليعطيها له.
يقول «حمدون» عن تلك اللحظة في برنامج مدفع رمضان: «ماكنتش مصدق نفسى، وقلت مستحيل الفلوس دى تكون ليا وأنا ماعملتش حاجة وبكيت، لكن رمضان قال لى انت فُزت بـ100 ألف جنيه، فقلت له انت بتهزر ولا بتتكلم جد، ليرد والله نصيبك وألف مبروك».
فائز في برنامج مدفع رمضان
يحكى عم حمدون عامل النظافة الذى يخرج بحثاً عن رزقه: «كنت بأمشى فى الشارع أكلم ربنا وأقول له أنت عالم بحالى.. اجبرنى يا جبار، إنت عارف إنى شغال ليل نهار بـ40 جنيه بس وإن ولادى احتياجهم أكبر من قدرتى، ففجأة لقيته استجاب لدعواتى وبعت لى محمد رمضان اللى جبر بخاطرى، لحد ما بكيت من الفرحة».
مدفع رمضان
لدى «حمدون» ابنة أصيبت فى حادث وينفق الكثير من الأموال على علاجها، ويسكن فى منزل بسيط بالإيجار خالٍ من الأثاث: «بنَّام على مرتبة فى الأرض علشان مفيش سراير، لكن ربنا كريم وبعت لنا رزقنا فى الشهر الكريم».
أحلام بسيطة تراوده: «كان نفسى فى تلاجة وغسالة وبوتاجاز، وفجأة ربنا كرمنى بمبلغ كبير عمرى ما مسكته، أنا أحلامى بسيطة وهى إنى أعيش مستور وأكمل رسالتى فى الحياة تجاه ولادى الصغار، كنت فرحان وهعمل عملية لبنتى، ونفسى يكون عندى بيت ملك لأولادى لأن الإيجار صعب وأنا رجل أرزقى».
