كريم سرور يكشف تفاصيل فيلم في عز الضهر: سينما جديدة ومختلفة
كريم سرور يكشف تفاصيل فيلم في عز الضهر: سينما جديدة ومختلفة
كشف المؤلف كريم سرور عبر حسابه الرسمي بموقع التواصل الإجتماعي فيسبوك، تفاصيل فيلمه الجديد في عز الضهر أول بطولة مصرية للفنان العالمي مينا مسعود.
ونشر كريم سرور البوستر الدعائي لفيلمفي عز الضهر معلقا: تنبيه هام، الفيلم ده لا فيه بلطجى بيخمس بموتوسكيل ولا فيه واحد بينتقم من صاحبه عشان باعه فى قعدة ضرب ولا اتنين بيحبوا بعض ولازم يطلقوا عشان مش عارفين يتجوزوا .. فيلم فيه فكرة حاولنا على قد ما نقدر نقدمها بأفضل صورة، فكرة تناسب عقلية أي بنى آدم عايش على الكوكب ده (مش المصريين أو العرب بس) فأتمنى الفكرة توصلكم وتحبوها زى ما حبينا نحترم عقلية المشاهد ونقدم سينما جديدة ومختلفة ومش بقول كدة لأنه فيلمى بس بقول كدة لإنى اتمنيت طول عمرى اتفرج على فيلم مصرى يخاطب الإنسان فى المطلق مش يخاطب الفرد بعينه.
وأضاف: فى نفس الوقت ميكونش مستقل ومتفرد بعناصر وطريقة سرد مستقلة.. لأ يبقى فيلم تجارى عادى هدفه التسلية والإمتاع ونضيف عليه الإشباع .. التسلية من الدراما ، والإمتاع البصرى فى الأكشن والديكورات ومواقع التصوير حول العالم والإشباع من الفكرة.
وتابع سرور: فالحمدلله آخيراً ورسمياً المارد خرج من القمقم بعد خمس سنين ونتمنى بجد نكون عند حسن ظنكم ونبقى قدمنا حالة جديدة ومختلفة عن السائد مع كامل احترامى ومحبتى وإعجابى بكل ما يقدم فى السينما فى كل أنواع الأفلام المقدمة للمشاهد العربى ومشكور كل مجهودات كل القائمين فى الصناعة على تقديم محتوى غنى ورؤى ،خاصة تتناسب مع كل فئات الجمهور .
واختتم: إحنا حابين نقولكم جايبين فيلم مختلف، وبقول تانى يارب يعجبكم وتحبوا النوع ده وتطلبوا منه تانى.. لينا لقاء قريب يوم ١٨ / ٦ فى كل سينمات مصر والوطن العربى ،نشوفكم على خير.
أبطال فيلم في عز الضهر
ويشارك في بطولة فيلم في عز الضهر عدد كبير من الفنانين، أبرزهم مينا مسعود، شيرين رضا، محمود البزاوي، جميلة عوض، بيومي فؤاد، إيمان العاصي، محمود حجازي، ميرنا نور الدين، محمد على رزق، محمد عز، إيهاب فهمي، كريم سرور.
