ورد وشيكولاتة.. مفاجأة لـ«محمد» من والديه في «آخر أيام الكلية»

في آخر أيام امتحانات الفرقة الرابعة بكلية التمريض بجامعة كفر الشيخ، فوجئ محمد سامي، الطالب بالفرقة ذاتها، بوالدته ووالده موجودين في الحرم الجامعي ليقدما له «بوكيه ورد وشيكولاتة» بمناسبة تخرجه من الكلية.

الفرحة ارتسمت على وجه «محمد» وزملائه في الكلية، الذين وقفوا يصفّقون لهذا المشهد الإنساني الرائع، ويلتقطون الصور التذكارية للطالب ووالديه، توثيقاً لهذه اللحظات التي لن تتكرر.

«محمد»: كانت بجد أحسن مفاجأة

لم يعلم «محمد» بقدوم والديه إليه، حيث قرّرا أن مفاجأته والاحتفال معه بآخر امتحان في حياته العلمية، ومناقشة مشروع التخرّج، الأمر الذي خلق سعادة كبيرة بداخله: «كانت بجد أحسن مفاجأة، إحنا دايماً متعودين نكون مع بعض، حتى اخواتي لولا إنهم مسافرين خارج مصر كانوا جُم معاهم الكلية، لكن كلموني فيديو واحتلفوا بيّا، وبجد ربنا يخليهم ليّا ويحميهم».

حرص «محمد» على تقبيل يدي والديه عقب مفاجأته بالورد والشيكولاتة: «شعوري مايتوصفش، فرحت أوي إني مهم في حياة والدي ووالدتي، وأصحابي كمان كانوا مبسوطين بينا، ورقصوا وضحكوا واتصوروا معانا كتير، وكان يوم جميل جداً بجد، والحمد لله إنهم موجودين في حياتي، دي نعمة من ربنا، حقيقي باحمد ربنا عليها».

والدا «محمد»: فرحانين إن ابننا بيتخرج

أصرت سحر عامر وزوجها سامي عبدالرحمن، على توزيع الشيكولاتة على زملاء وأصدقاء نجلهما «محمد» في الحرم الجامعي، وعبّرا عن فرحتهما بكلمات رقيقة: «فرحانين إن ابننا بيتخرج، لأنه آخر العنقود زي ما بيقولوا، إحنا عندنا الدكتورة مريم طبيبة بيطرية، والدكتور عبدالرحمن صيدلي، وأخيراً محمد اللي هيكون أحلى أخصائي تمريض، وربنا يوفّقه في حياته الجاية، والحمد لله إننا أدينا رسالتنا على أكمل وجه، ووصلنا بيهم لبر الأمان».

• جامعة كفر الشيخ
• كلية التمريض
• امتحانات
• كفر الشيخ
• طلاب
• بوكيه ورد
• شيكولاتة
• الصور التذكارية
• محافظة كفر الشيخ