كتبت: شيماء مختار ونهى نصر

«عمرنا كله قضيناه فى الشغلانة.. لكن دلوقتى مفيش حد بيطلب الشغل زى زمان وأغلبه لديكورات المسلسلات»

مكان صغير يوجد فى الطابق الثانى بأحد المبانى التجارية بشارع المعز فى محافظة القاهرة، بجواره مجموعة من المحلات المصممة بالطراز القديم، عندما تتجول بداخله تشعر وكأنك فى الزمن الجميل، إذ يحوى أشكالاً وتصاميم مختلفة من الأرابيسك، تمزج ما بين القديم والحديث.

فعندما تنظر أمامك تجد عدداً من البرافانات القديمة، وناحية اليمين تجد «تسريحة ومرآة»، أما فى جهة اليسار فتجد «صوانى وأباجورات مصنوعة من هذا الفن»، وعندما تنظر فى السقف تجد أشكالاً متنوعة من النجف المصمم بالأرابيسك أيضاً ومطلى باللون البنى.

وتشهد شوارع القاهرة نوستالجيا كل العصور، فما زال فن الأرابيسك مستمراً حتى وقتنا هذا فى شارع المعز، حيث توجد العديد من الورش القديمة التى تبدع فى هذا الفن العريق، منها ورشة «على عباس»، فهى يعود عمرها إلى أكثر من 100 عام، إذ ورث هذه المهنة عن أجداده ووالده: «مهنة الأرابيسك دى كان أجدادى هما اللى بيمارسوها وبعدين والدى وبعدين أنا واخواتى، يعنى عمرنا كله»، بحسب ما رواه لـ«الوطن».

«علي»: «الشغل بقى نادر عشان مفيش عمال كتير استمروا في المهنة.. والشغل صعب وعاوز صبر»

أنواع مختلفة من الأرابيسك يصنعها «على» داخل ورشته، منها الصوانى والأباجورات والنجف وكذلك البرافان: «شغل الأرابيسك بقى نادر عشان مفيش عمال كتير استمرت فى المهنة دى، والشغل صعب وعاوز صبر»، مشيراً إلى أنه يتم استخدامه حالياً فى ديكورات المسلسلات والدول العربية: «دلوقتى مفيش حد بيطلب الشغل زى زمان وأغلبه لديكورات المسلسلات».

مع مرور الزمن طور «على» من المهنة لدرجة أنه ورثها لابنه وأبناء إخوته: «إحنا حالياً بنطور فى المهنة بشكل مختلف عن زمان، يعنى بنضيف تصاميم جديدة زى الصدف والزجاج وغيره، والمهنة دى منقدرش نسيبها عشان دى مصدر رزقنا والشغلانة دى اللى بيسيبها يرجع لها تانى وكمان أهو علمناها لأولادنا»، معبراً عن مدى حبه لمهنة الأجداد: «فيها ريحة الحبايب».

الأرابيسك من الفنون الفريدة على مر العصور، فهو عرف بالزخرفة العربية أو الفن العربى، حيث يتكون بشكل أساسى من أنماط خطية إيقاعية وأنماط هندسية معقدة لتزيين الأشكال المتقاطعة، وإذ كانت مصر رائدة فى فن الأرابيسك، فهى اشتهرت فى الحضارة الإسلامية بزخارفها الخشبية الفريدة داخل العالم العربى وخارجه.