سر نبوءة قارئة الفنجان و30 يوم مكالمات.. كيف بدأت قصة حب إيناس الدغيدي وأحمد سوكارنو؟ |عاجل
سر نبوءة قارئة الفنجان و30 يوم مكالمات.. كيف بدأت قصة حب إيناس الدغيدي وأحمد سوكارنو؟ |عاجل
لطالما عاشت المخرجة إيناس الدغيدي في مرمى الاتهامات بسبب تصريحاتها الجريئة، وكان زفافها أيضاً لافتا للأنظار، وكشفت «الجريئة» في لقاء مع الإعلامية لميس الحديدي عبر قناة النهار، أن خطوة الزواج ورائها قصة حب بدأت صدفة وكُللت بزواج حضره الأصدقاء المقربين.
كيف بدأت قصة حب إيناس الدغيدي وأحمد سوكارنو؟
بعد 24 ساعة فقط من زفافها، ظهرت المخرجة إيناس الدغيدي على شاشة قناة «النهار» لتروي تفاصيل قصة زواجها من أحمد سوكارنو، التي بدأت بالصدفة عن طريق صديق مشترك، لتتحول المعرفة إلى قصة حب استمرت شهرًا من المكالمات اليومية قبل أن تتوج بلقاء بعد ستة أشهر.
وقالت إيناس الدغيدي: «قارئة الفنجان لما شافته قالتلي هتقابلي واحد اسمه أحمد، عمرك ما شوفتيه، وهيكون في حياتك لآخر يوم فيها وبالفعل جه سوكارنو من أستراليا، وبعد فترة صديق مشترك بينا أنا واحمد، سأله في زيارة ليه، مين بيعجبك من الفن، قاله بتعجبني جدًا إيناس الدغيدي».
أما أحمد سوكارنو فروى الجانب الآخر من القصة، قائلًا: «الفنان الصديق المشترك بينا كان في سيدني، واتعشينا سوا ضمن لقاء مع رجال أعمال هناك وأثناء الحديث سألني هل بتتابع مصر أو نزلتها قريب؟ قلت له آخر مرة كنت فيها أيام السادات تقريبًا سنة 1982، لكن أنا متابع جيد جدًا لما يحدث في مصر، من دوري وبرامج، وكنت من أشد المعجبين بإيناس الدغيدي، بصراحتها وجرأتها لأنها بتقول اللي الناس مؤمنة بيه بس بيخافوا يقولوه، رغم ان ناس كتير شايفينها جريئة وقوية، أنا شفتها طيبة جدًا، وما خفتش من قوتها».
الشعور بالحب لأول مرة من 18 عاما
وأضافت إيناس الدغيدي:«لما شوفت كلامه عني حسيت إنه كان خجول وهو بيتكلم، وكان في إعجاب تاني غير فني حسّيت إني ممكن أرد عليه، وخدت رقمه وبعتله وقولت له ميرسي على الكلام الحلو اللي قاله، قالي: «إنتي كوين مصر، والكلمة دي عجبتني جدًا، بعدها طلب يكلمِني 3 دقايق، وفعلاً اتكلمنا، وقعدنا شهر نحكي كل يوم، كنت مأجلة المقابلة 6 شهور، لكنه أصر وقال لازم أجي أشوفك، ومن أول ما عرفني كان ناوي يتجوزني».
وتابعت:«هو راجل تقيل مش خفيف، عنده بيزنس وناجح، ومش من النوع اللي بيحاول يجامل أو يمثل، جه وكسرلي كل القواعد، كنت قاعدة لوحدي 18 سنة، وكنت خايفة أغير حياتي، لكن لما شُفته اتبدّل إحساسي».
وقال سوكارنو خلال اللقاء:«أنا كنت متجوز قبل كده، وعندي أولاد وأحفاد صغيرين، إحنا الاتنين أجداد، واختارنا تاريخ الجواز يوم 10 أكتوبر لأنه نفس يوم ميلاد أول حفيدة ليا، ولما حصل نصيب قولت ليه لأ؟ آن الأوان».
ابنة إيناس الدغيدي كان لها دور أيضا في موافقة والدتها، وقالت إيناس:«حتى بنتي لما قابلته كانت في الأول متوترة وقلقانة، لكن بعد ما قعدت معاه وافقت وشافت إنه شخص محترم وجاد».
