شوبير: الطنطاوية بيفرحوا بمولد السيد البدوي.. وأتحفظ على الاحتفالات الغريبة

علق الإعلامي أحمد شوبير لاعب الأهلي السابق، على الاحتفالات الغريبة المتداولة عبر منصات التواصل الاجتماعي، الخاصة بمولد السيد البدوي في طنطا، وكتب عبر حسابهعلى «فيس بوك»: «صباح الفل جميعا، تعليقا على ردود الفعل على حضور مليون شخص أو يزيد مولد السيد البدوي، أحب بس أوضح باعتباري طنطاوي جدا إن ده العادي بتاع مولد السيد البدوي من زمان أوي، وإننا من صغرنا كنا بنحتفل بالمولد مع ضيوف من بلاد كتير أوي، منهم من دول مجاورة، وإن يومين المولد دول هما أهم يومين تقريبا لطنطا كلها لأن كل محلات الحلويات وغيرها تقريبا بيكون المولد أهم مصدر لها على مدار السنة كلها مع بعض المناسبات الدينية الاخرى زي مولد النبي بالمناسبة».

شوبير: عظماء التلاوة شاركوا في احتفالات السيد البدوي

كشف «شوبير» كيف كان يحتفل بمولد السيد البدوي عندما كان في مرحلة الطفولة: «كمان كنا بنستنى تاني يوم المولد موكب الخليفة ونرمي عليه ورد وكان بيبقى يوم فرح في طنطا وكان المنشدين وكبار قراء القرآن الكريم وعلى رأسهم أبناء محافظة الغربية الشيخ محمود الحصري والشيخ سيد النقشبندي والشيخ مصطفى إسماعيل وغيرهم من عظماء التلاوة كلهم كانوا بيحيوا المولد في طنطا والأكتر من كده أن السفير الأمريكي وعدد من السفراء الأوروبيين كانوا دايما من أوائل الحضور للمولد كظاهرة اجتماعية واقتصادية ودينية جميلة».