تقام حاليا ندوة للفنانة الكبيرة يسرا ضمن فعاليات مهرجان الجونة السينمائي، احتفالًا بمرور 50 عامًا على مشوارها الفني، وسط حضور كبير من النجوم والجمهور.

وقالت يسرا خلال الندوة: «لما دخلت المعرض بتاعي في مهرجان الجونة، شوفت حياتي كلها، وبشكر كل الناس اللي في حياتي اللي ساعدوني إني أمثل وأعمل حاجات حلوة في حياتي، من غير حب الناس مفيش حاجة، ومهما عملت مش هتوصل من غير حب الناس وعيلتك».

يسرا تكشف كواليس 50 سنة فن في حياتها

وأضافت يسرا ضمن فعاليات مهرجان الجونة السينمائي، «الخمسين سنة اللي فاتوا كان وراهم تعب ومجهود كبير، أنا عملت 25 فيلم في أول حياتي سقطوا سقوطًا ذريعًا، وكنت مش مصدقة وبقول مينفعش أكمل، لكن قعدت أحاسب نفسي عشان أعرف السبب، وروحت المعهد وأنا أصلًا مش طالبة فيه، وحضرت كل المونتاج بتاع فيلم الكرنك، وهناك عرفت كل تفاصيل السينما، وعرفت يعني إيه راكور إحساس مش شكل بس».

وتابعت يسرا:«الموهبة لوحدها مش كفاية، لازم يكون عندك صبر وذكاء واختيارات، وتتعلم من تجارب الآخرين وتشوف الناس اللي نجحت عملت إيه، أنا كنت بقعد أشوف فاتن حمامة وبتفكر في الحاجات إزاي وبتقول رأيها إزاي».

واستكملت حديثها قائلة: «أصعب حاجة في الفن هي الاستمرارية، إنك تفضل في مكانك الكبير لأن مجهودك بيبقى تلات أضعاف، فاكرة مثلًا لما رجعت من فالنسيا كنت بقرأ أول نسخة من الإرهاب والكباب بعد فيلم اللعب مع الكبار، ولما قريت السيناريو لقيت دوري مشهد واحد ومش هظهر تاني، ومقدرتش أرفض لوحيد حامد حاجة».

وكشفت يسرا كواليس الفيلم قائلة: «بعدها بكام يوم قعدت مع شريف عرفة ووحيد حامد، وشريف خدني على جنب وقالّي: إنتِ مردتيش على الفيلم ليه؟ قولتله الدور صغير، قالّي ملكيش دعوة أنا عايز أشتغل معاكي، وكان الفيلم اسمه الأول الجارحي قبل ما يبقى الإرهاب والكباب، واللي طلع في النهاية الفيلم العظيم».

• يسرا
• مهرجان الجونة السينمائي
• مهرجان الجونة
• الجونة السينمائي