مؤلفة «ما تراه ليس كما يبدو» لـ إسعاد يونس: ليلى زاهر أبهرتني من أول مشهد
مؤلفة «ما تراه ليس كما يبدو» لـ إسعاد يونس: ليلى زاهر أبهرتني من أول مشهد
كشفت المؤلفة هند عبدالله عن تفاصيل إنسانية مؤثرة من حياتها الشخصية، موضحة أن وفاة والدتها أثناء ولادتها، وكونها واحدة من 14 أخًا وأختًا من زيجات مختلفة، تركا أثرًا كبيرًا في طفولتها، لكنها اعتبرت تلك التجارب فيما بعد من أهم أسباب نضجها الإنساني والإبداعي.
فقدت والدتها يوم ولادتها.. وعاشت في بيوت متعددة
وقالت هند خلال استضافتها ببرنامج «صاحبة السعادة»، المذاع على قناة «dmc»، وتقدمه الإعلامية والفنانة إسعاد يونس، «طبعًا وفاة والدتي وأنا بتتولد كانت من أكتر الحاجات اللي أثّرت فيّ، وكمان إننا 14 أخ وأخت من زيجات مختلفة، خلّى إحساسي بالانتماء دايمًا مهزوز، أنا بحب أهلي جدًا، وكانوا حنينين عليا، يمكن أكتر من غيري، بس كنت دايمًا حاسة إني مختلفة».
وأضافت: «أنا الطفلة الوحيدة اللي ما اتضربتش في البيت، وده كان بيخليني مش فاهمة ليه أنا غير الباقيين، طول الوقت كنت بتنقل من بيت لبيت من غير سبب واضح، وكنت بحاول أتأقلم كل مرة مع ناس جديدة، بس في لحظة كنت خلاص بتأقلم، ألاقي نفسي رايحة مكان تاني، ده لطفلة بيكون مؤلم جدًا، مش عشان في قسوة، لكن عشان مافيش استقرار».
وأوضحت أنها عندما كبرت، بدأت ترى تلك التجارب بشكل مختلف: «دلوقتي لما بفكر، بحمد ربنا إن ده حصل، التجربة دي علمتني أتكيف بسرعة، أفهم الناس، وأقرأ مشاعرهم، وده ساعدني جدًا في الكتابة، فكرة إنك تتربى في كذا بيت بتديك قدرة غريبة على فهم الحياة من زوايا مختلفة».
ليلى زاهر أبهرتني.. وبكيت من أول مشهد
وتحدثت هند عن أداء الفنانة ليلى زاهر في مسلسل «ما تراه ليس كما يبدو» المأخوذ من قصة حياتها، قائلة: «بصراحة، في الأول ما كنتش عايزاها تمثل الدور، كنت شايفها كيوت أوي ولسه متجوزة، والورق تقيل ومليان وجع، بس من أول تيك شفتها فيه على المونيتور، في مشهد الدكتور النفسي اللي بتحكي فيه عن أهلها وعدم الاستقرار، عيطت فورًا، حسّيت إنها فهمت الشخصية من جوّاها».
واختتمت قائلة: «ده أول مرة أعيط في اللوكيشن من مشهد، لأنها صدقت الإحساس بجد، يمكن لأنها عاشت جزء منه بطريقتها، أو لأنها صدّقت حكايتي بصدق، وده كان سبب نجاح الدور، لأنه طالع من وجع حقيقي».
