روابط لتشجيع الأندية الأجنبية: أهلا بك فى «ليفربول» و«برشلونة»

10:13 م | الأحد 11 أكتوبر 2015

البعض يعتقد أن التعصب الكروى بين الشباب المصرى يقتصر على قطبى الكرة المصرية «الأهلى والزمالك»، فمع تطوّر كرة القدم من مجرد رياضة إلى صناعة لها آلاتها التسويقية، تبارت الأندية الأجنبية فى تسويق اسمها وتاريخها العريق فى كل دول العالم عن طريق إنشاء أكاديميات ومدارس الكرة للشباب ومتاجر خاصة بالنادى سواء كانت عبر الإنترنت أو على أرض الواقع، والجولات التى تقوم بها فرق النادى فى فترة الراحة الصيفية، وتُعد أبرز تلك الخطوات فى تسويق اسم النادى دعم روابط التشجيع الخاصة به فى دول العالم المختلفة واعتمادها لتصبح روابط تشجيع رسمية.

«ليفربول رغم أنه بقى له فترة بعيد عن الألقاب بس هو نادى كبير وله مشجعين فى فترة مايكل أوين»، كلمات بدأ بها أحمد صلاح حديثه عن النادى، ثم استطرد الحديث عن نشأة رابطة مشجعى ليفربول فى مصر قائلاً: «قبل 2005 مكنتش كتير بألاقى حد بيشجع ليفربول، نقدر نقول إن البداية كانت فى 2008، قبل كده كنا بنتفرج كل واحد لوحده، بس فى صلاة جمعة قابلت صاحب الفكرة ومؤسس الجروب الدكتور أحمد زيدان، هو دلوقتى فى أمريكا وبنعتبر منصبه شرفى، كانت فكرته إن بدل ما كل واحد يتفرج لوحده، ليه مننزلش كلنا نشوف الماتشات سوا، وعملنا جروب عالفيس بوك وكنّا حوالى 30 مشجع، وكنا بنلبس تيشيرت النادى وننزل نشوف الماتشات سوا».

{long_qoute_1}

وعن تطور المجموعة قال «أحمد»: «التجمع مكانش بيزيد عن عشرة أو خمستاشر واحد، بس مع وجود سواريز وستوريدج مع روى هودسون والكينج دانى دالجيش كمديرين فنيين، بدأ ليفربول يؤدى أداء ممتع فالناس بدأت تتابعه والناس بدأت تشجع ليفربول وتتابع الدورى الإنجليزى، ومع ارتباط النادى بإشاعات شراء محمد صلاح، فالناس بدأت تدخل المجموعة وتكتر، وبقينا مش مجرد بنتجمع فى المعادى، لا فيه تجمع فى مدينة نصر وكذا مكان فى القاهرة، بجانب تجمعات فى المنصورة وكمان فيه مصريين بيتجمعوا فى السعودية وقطر وأمريكا عشان يتفرجوا، وبقينا كمان بعد ما كنا مجرد بنتفرج سوا حسب الأماكن اللى بنحددها، بدأنا ننظم دورات كورة بيننا وبين بعض وشوية خروجات بقى وكده بحيث إننا نتعرف على بعض أكتر ونكسب ناس، لأن ده هو الهدف من الرياضة أصلاً قبل ما يكون التعصب والتشجيع».

واستطرد عن علاقة النادى بالمجموعة قائلاً: «إحنا مجموعة مشجعين معتمدين من النادى، قعدنا نراسل النادى لمدة 3 سنين وتم اعتماد المجموعة من 2013، فبنلم فلوس العضويات من بعض والمقابل بيكون عبارة عن (باكدج) لمشجع ليفربول، فيها مجلة النادى ودبوس وعلم وأجندة واشتراك فى النادى لمدة شهر واشتراك فى تليفزيون النادى الرسمى، وممكن تحجز تذاكر للأندية بسهولة أكتر من العادى، وجين مسئولة الجروب المصرى فى النادى جت وقعدت معانا كذا مرة هنا فى مصر».

وعن رابطة مشجعى نادى برشلونة فى مصر حدثنا محمد حمدى قائلاً: «دلوقتى الكرة فى مصر يعتبر مبقاش ليها طعم مع هبوط مستوى الفرق فى مصر وكمان غياب الجماهير قاتل، طبعاً برشلونة نادى كبير وهو أحسن نادى فى العقد اللى فات، وله جماهير كتير فى مصر، بس الفكرة إننا كنّا بننزل نشجع لوحدنا فمبيكونش فيه حماس ولا روح، فاقترحت أنا وشوية من أصحابى إننا نعمل جروب عالفيس بوك لمشجعين برشلونة فى مصر، وننظم تجمعات وننزل نشوف الماتشات مع بعض، وحسينا إنه بقى فيه حماس وكده، وكانت أحلى لحظات حياتنا لما احتفلنا سوا بالثلاثية السنة اللى فاتت، كان التجمع فيه أكتر من ألف واحد، من كل محافظات مصر، ناس من بورسعيد وإسكندرية والمنصورة والأقصر وأسوان وبدأنا نشوف إننا نعمل تجمع فى كل محافظة».

واستطرد «محمد» عن علاقة المجموعة بنادى برشلونة: «إحنا بنراسل النادى بقالنا فترة، وبنحاول نكون جروب معتمد، بس شروط نادى برشلونة صعبة، لأن سعر العضوية غالى بالمقارنة بباقى الأندية، ولازم اللى يعملها يكون معاه جنسية البلد اللى فيها الجروب ويروح يعملها من هناك فى برشلونة بنفسه، وكمان بيطلبوا تصاريح من وزارة الداخلية المصرية والشرطة فى مصر وده صعب طبعاً عشان الداخلية فاكرانا جماعات وجو ألتراس وكده بقى، والتضييق ده عامل لنا مشكلة بعد ما لقينا حلول لباقى المشاكل».

وعن وضع نادى برشلونة السياسى ودعمه لاستقلال إقليم كتالونا قال «محمد»: «نادى برشلونة هو النادى الوطنى اللى هناك اللى بيمثل الإقليم وكده، بس بالنسبة للاستقلال ده أعتقد الموضوع صعب عشان طبيعة المملكة الإسبانية وأعتقد أن الحزب اللى خد الأغلبية فى برلمان الإقليم، على الرغم من إنه بيدعم الاستقلال بس هيكون همه الأساسى هو الوصول لحلول للمشاكل اللى بتواجه الناس قبل أخد قرار الانفصال، أما النادى صعب يسيب الدورى الإسبانى عشان العقود اللى بين النادى وشركات تسويق الدورى وإذاعة الماتشات والعوائد الكبيرة من العقود دى، وكمان من الصعب أن الفريق يروح يشارك فى دورى تانى عشان قوانين الاتحادات التانية ولوائح الفيفا واليويفا وكده».