«هتبقى شادية الصغيرة».. لبلبة تغني وتستعيد ذكرياتها مع المخرج محمد عبد العزيز

في لحظة مليئة بالمشاعر والحنين، شاركت الفنانة لبلبة في ندوة تكريم المخرج الكبير محمد عبد العزيز ضمن فعاليات مهرجان القاهرة السينمائي الدولي في دورته الـ46، إذ حرصت على الغناء، وأعادت بصوتها أغنية قديمة قدمتها في أحد أفلامه، لتتحول الندوة إلى لحظة فنية صادقة تجمع بين الذكريات والعرفان.

وقالت لبلبة خلال الندوة: «أول مرة شفت الأستاذ محمد عبد العزيز كانت عن طريق الفنانة ماجدة الخطيب، خدتني لمكتبه، وأول ما شافني قال: دي هتبقى شادية الصغيرة. فعلاً اختارني في فيلم (في الصيف لازم نحب)، وغنيت فيه أغنية بحبها جدًا لحد النهارده، وهي (شيء طبيعي نحب.. لازم نحب)، ودي كانت البداية الحقيقية بينا».

وأضافت: «بعد كده اشتغلنا في أفلام كتير، وكان بيهتم بكل التفاصيل، حتى اختيار الفساتين، ولما كان يختار فستان واحد كنت أجيب تلاتة عشان يكون عنده اختيارات، كنت بشتغل معاه أنا ومديحة كامل وأميرة، وكان دايمًا بيقولنا إن الكوميديا لازم تتقدم بصدق مش بافتعال الضحك».

واستعادت ذكرياتها معه في فيلم «البعض يذهب للمأذون مرتين» قائلة: «قالّي الجملة دي تقوليها عادي جدًا، من غير تمثيل، الناس ممكن تضحك وممكن لا، لكن المهم إن الشخصية تتقدم صح. ومن وقتها وأنا ماشية على كلامه».

وتابعت: «في فيلم (خلي بالك من جيرانك) كان مرشحة بطلة تانية، واعتذرت قبل التصوير بيومين، ونزل الأستاذ محمد وقال (البت نونيا تعمل الدور حلو أوي)، وفعلاً اداني أول بطولة مطلقة والفيلم نجح جدًا. علمّني ازاي عيني تتكلم قبل لساني، وقال لي لما يبقى في كلوز متتهزيش، عيني هي اللي تقول الكلمة».

واختتمت الفنانة لبلبة حديثها وهي توجه كلمتها للمخرج الكبير قائلة: «لك فضل كبير عليّا يا أستاذ محمد، وكل اللي اتعلمته منك لسه ماشية بيه لحد النهارده».

• مهرجان القاهرة السينمائي
• لبلبة
• النجمة لبلبة