بالصور| مأساة أسرة في الشرقية.. "الملاح" وأحفاده الـ11 "على الرصيف"
بالصور| مأساة أسرة في الشرقية.. "الملاح" وأحفاده الـ11 "على الرصيف"
داخل خيمة بسيطة بجوار بحر مويس بمنطقة القناطر التسعة بمدينة الزقازيق يقيم "مسن" وأحفاده الـ11 بعد أن عجز أن دفع قيمة الإيجار وطردهم مالك المنزل من مسكنهم.
يقول محمد سعد علي الملاح (76 عاما): "إحنا نايمين في الشارع بقالنا 21 يوما أنا وأحفادى الـ11، هدى (18 عاما)، بوسى (10 أعوام) رحمة (8 أعوام)، رابعة عام ونصف، أدهم 4 (أعوام)، وعبدالسلام (5 أعوام)، رشا (10 أعوام)، أحمد (عامين)، محمد (عام ونصف)، ووليد (10 أعوام)، وياسمين (10 أعوام)، بالإضافة لاثنتين من أمهات الأحفاد وأنا المسؤول عنهم بعد ولادي الاتنين ما اتحبسوا في مشاجرة".
وتابع: "كنا ساكنين في شقة بالإيجار في كفر الزقازيق واتأخرنا في سداد قيمة الإيجار فصاحب البيت طردنا وروحنا قعدنا في عشة جنب السويقة في منطقة أبوعامر ناس اتخانقت معانا ومشونا فعملت خيمة بملايات السرير والأغطية بتاعتنا جنب بحر مويس وجبت أحفادي وقعدنا فيها".
وواصل قائلا: "رئاسة مركز مدينة الزقازيق مش سايبانا في حالنا وحتى أخدوا شمسية كانت بضلل عليا أنا والعيال وروحت مجلس المدينة وقدمت شكوى قالولي (شمسية إيه اللي عاوزها انت أصلا قاعد مخالف وامشي من هنا بدل ما نشيلك الخيمة كلها"، وتابع قائلا: "تقدمت بعدة طلبات للمحافظ ورئيس مركز ومدينة الزقازيق عشان يوفر لنا شقة لو حتى بإيجار بسيط بس محدش عملنا حاجة".
وتابع قائلا: "أول أمس المحافظ كان في جولة بيتفقد شوارع مدينة الزقازيق وعدى علينا وشافنا وإحنا قاعدين في الخيمة وقالي تعالى بكرا المحافظة عشان نبحث لك توفير شقة وبالفعل روحت ومعرفتش أقابله ودوخت على الموظفين قالولي قدم طلب وفوت علينا بعدين فقولتلهم أنا مقدم طلبات قل كدا والمحافظ شافنا إمبارح على الطبيعة وإحنا قاعدين في الشارع وهو اللي قال تعالى المحافظة عشان نوفرلك شقة".
وأشار الملاح قائلا: "قالولى فوت علينا بعدين، فمشيت وأنا مش عارف هروح بالعيال دى كلها فين وإحنا داخلين على فصل الشتاء وكلهم أطفال".
وقال الرجل السبعيني: "أنا راجل كبير في السن ومعدتش أقدر على الشغل وكل اللي بقدر أعمله إني أبيع شوية مناديل أنا والعيال الصغيرة عشان يا دوب نوفر حق الأكل ولا نجيب هدمه قديمة تسترهم وخايف حتى الخيمة اللي أويانا دي مش نلاقيها لو بتوع مجلس المدينة شالوها عشان بيقلولنا أنتم مخالفين ومش من حقكم تقعدوا هنا"، وتساءل قائلا: "طاب نروح فين يا ناس وأعمل إيه دا المحافظ لما شافنا بنفسه وقالي تعالى المكتب روحت ومعرفتش أقابله ولا الموظفين عملولي حاجة".
والتقطت "هدى" حفيدته طرف الحديث قائلة: "إحنا مش عارفين نعيش معندناش غير بابور غاز قديم نسخن عليه عيش ولا نعمل عليه شوية رز وبنجيب المية بجردل من البحر عشان نغسل هدومنا وبنروح المساجد عشان لو عاوزين نغير ولا نغسل وده طبعا بيكون من صلاة الظهر لحد صلاه العشاء بس لأن بعد كده المساجد بتقفل".
وتابعت قائلا: "عاوزين حد من المسؤولين يحس بينا يوفروا لنا 4 حيطان بس في أي مكان وإحنا هنقعد ونام على البلاط بس يكون في حيطة تدارينا وسقف يسترنا، ده إحنا بنبقى نايمين مرعوبين في الخيمة لحد يتعرض لينا ولا يأذينا".
يشار إلى أن محافظة الشرقية أعلنت خلال بيان لها تحت عنوان "لافتة حانية من المحافظ"، أنه أثناء جولة محافظ الشرقية الدكتور رضا عبدالسلام لشوارع مدينة الزقازيق لمتابعة أعمال النظافة وإزالة الإشغالات بالشوارع تصادف مروره بمنطقة قناطر تسعه قد شاهد أسرة بأكملها تقيم في خيمة وتوقف المحافظ أمام عائل الأسرة ويدعى "محمد سعد علي الملاح"، وتساءل عن أسباب إقامتهم في الشارع فأجاب رب الأسرة بأن ليس له مأوى وأنه لا يستطيع تأجير مسكن، وعلى الفور قرر المحافظ لقاء رب الأسرة بمكتبه في صباح اليوم التالي لبحث إمكانية توفير مسكن بإحدى العمارات السكنية للمحافظة وتوفير كل ما يلزم هذه الأسرة من مساعدات حفاظا على هذه الأسرة، خصوصا ونحن مقبلون على فصل الشتاء ولن تتحمل الأسرة برد الشتاء القارس.
وقال المحافظ: "كيف نترك هذه الأسرة وأين أصحاب القلوب الرحيمة لأسرة تنام في الشارع ويمر عليها الكثيرون ولا يقوم أحد بتوفير مسكن أو العطف عليها".